O Foro Económico aposta por tirar proveito das nosas fortalezas TIC para o futuro de Galicia
venres, 24 de decembro do 2021
O
Foro Económico de Galicia, coordinado desde o Campus de Ourense polo
Grupo Governance and Economics Research Network (GEN), presentou este
martes 21 de decembro un documento que salienta as oportunidades que
ofrece a transformación tecnolóxica para o progreso empresarial e
produtivo da nosa terra, pero non unha transformación calquera senón
unha que sexa integral e que teña capacidade para eliminar a fenda
dixital entre espazos urbanos e rurais (alén doutros tipos de fendas
sociais, culturais, demográficas ou de xénero). Estamos
a falar do documento Dixitalización. Galicia 2040, realizado
pola súa unidade de investigación Galicia Grupo 2040.
Nel
destacan que a nosa terra “pode e debe tirar partido das
oportunidades que achega a dixitalización, xa que conta con vimbios
abondo para reducir a fenda tecnolóxica”.
Os
autores do estudo son os catedráticos da Universidade de Vigo
Fernando Pérez, Domingo Docampo e Xosé Carlos Arias, o economista
José Francisco Armesto e a profesora da Universidade de Santiago de
Compostela María Cadaval.
Na
presentación do informe, celebrada na sede de Abanca en Santiago de
Compostela, destacaron que Galicia “ten industria do hardware ben
desenvolvida e con capacidade exportadora, ben situada nas
tecnoloxías de mobilidade; un sector agrotecnolóxico maduro e
dispón dunha banda larga avanzada, en comparación con outros
territorios do ámbito estatal e da UE”. A comunidade, sinalaron,
“dispón dunha industria TIC forte, que é un dos mellores activos
cos que un país pode contar para garantir o seu futuro”, ademais
de empresas tractoras, universidades e centros tecnolóxicos
implicados no proceso de dixitalización. Por este motivo,
recalcaron, Galicia “debe aspirar a figurar en posicións
relevantes da cadea de valor TIC global e non conformarse con ser
simplemente os que integran ou personalizan a tecnoloxía creada por
outros”.
Os
expertos do Foro Económico recalcaron ademais que Galicia, como as
demais comunidades autónomas, vai dispor dun importante aporte de
fondos Next Generation EU. A súa xestión, engadiron, “adquire un
papel crucial para a transformación do tecido produtivo”, polo que
no informe presentado este martes definen os deberes dos actores
implicados para obter a máxima eficacia nesa xestión. En primeiro
lugar, apuntan que “a administración debe mellorar os seus
procedementos organizativos, ao tempo que ten que exercer un papel
impulsor na transición á economía dixital”. En segundo lugar,
sitúan o tecido empresarial e nomeadamente o sector TIC, que,
indican, “debe adaptarse á nova contorna dixitalizada e aproveitar
as oportunidades existentes”. Por último, citan o sistema
universitario galego e os centros tecnolóxicos, que, sinalaron,
teñen a obriga de contribuír coa súa investigación e coa
formación de persoal especializado en procesos de dixitalización.
O
Grupo Galicia 2040 está formado por analistas e investigadores co
obxectivo de trasladar á sociedade posíbeis escenarios de futuro
nos cinco eixos fundamentais de cambio: a dixitalización, os
procesos de urbanización, a demografía, os retos medio ambientais e
o xeoestratéxico. Neste segundo documento do grupo de traballo
presentado este martes, o enfoque adoptado foi o de dar a coñecer a
visión que as e os profesionais do ámbito tecnolóxico teñen e
poden transmitir a aquelas persoas e empresas que van ser
“dixitalizadas” e como os cambios van ser percibidos por estas.