O Estadio Abanca-Riazor da Coruña convértese nun caso de uso 5G

O Estadio Abanca-Riazor da Coruña, sede do Real Club Deportivo, converterase no estadio de Europa co máis completo despregamento de cobertura e casos de uso 5G. Como funcionalidade principal habilitarase a retransmisión en directo de eventos deportivos con realización automática baseada en Edge Computing e Intelixencia Artificial, dispoñendo ademais de servizos adicionais como KissCam, mapas de calor mediante realidade aumentada e TV multicámara.
Telefónica realizou a instalación dunha rede 5G dedicada que inclúe cobertura 5G tanto na banda de 3.5 GHz como en frecuencias milimétricas, asegurando niveis de ancho de banda de varios gigabits por segundo e latencias ultrabaixas, características esenciais para poder retransmitir de forma fluída múltiples fluxos de vídeo de definición ultra-alta e realizar o control robotizado de cámaras e análises de vídeo en tempo real.
Telefónica despregou ademais un centro de Edge Computing na Coruña, para aloxar a solución tiivii de Cinfo de retransmisión e realización automática de TV, que grazas aos seus algoritmos de intelixencia artificial é capaz de realizar en tempo real a análise de xogo, etiquetar as xogadas, e orientar e conmutar as cámaras para xerar un sinal realizado apto para un directo de TV. Todo iso desde a nube de baixa latencia que proporciona o Edge Computing e a rede 5G. Cinfo é ademais a responsable de casos de uso adicionais orientados a aumentar a participación do espectador no estadio, como son os servizos de KissCam e os mapas de calor por realidade aumentada.
Para o despregamento de rede utilizouse tecnoloxía de Ericsson, incluíndo unha das primeiras unidades de radio milimétricas do mundo en banda europea de 26 GHz, así como radio de 3.5 GHz e núcleos de rede 5 G tanto en tecnoloxías NSA (Non Stand Alone) como SA (Stand Alone), a rede 5G coas características máis avanzadas.
Adicionalmente, Vodafone colaborou para poder utilizar puntualmente o espectro de ambas as operadoras de forma conxunta na banda de 3.5 GHz, nunha serie de tests encamiñados a pescudar o máximo potencial posible nesta banda central de frecuencias, como paso previo á utilización de milimétricas.
Esta combinación de cobertura 5G de Telefónica con Ericsson, xunto coa solución tiivii da empresa Cinfo, móstranos entre outras moitas cousas as posibilidades de realizar a retransmisión dun evento sen ter que desprazar unha unidade móbil de TV ao lugar no que se produce, o cal traerá como consecuencia a democratización do directo e a realización profesional de todo tipo de eventos cuns custos moito máis reducidos, posibilitando directos de calidade para eventos rexionais e locais, algo que ata o de agora non resultaba rendible