O Consorcio de Santiago porá na Rede o inxente catálogo fotográfico de Xenaro Martínez Castro
venres, 10 de setembro do 2021
O
Consorcio
de Santiago levou a cabo a catalogación de máis de 100.000 imaxes
do histórico fotógrafo local Xenaro Martínez Castro (1957-2007),
especializado en fotografías de obras de arte e, durante algo máis
de dúas décadas, unha das principais testemuñas da crónica
cultural galega. Este fondo documental porase a disposición do
público e dos investigadores na páxina web do Consorcio unha vez
que o traballo rexistrado estea dixitalizado.
O
encargado de realizar esta tarefa é o fotógrafo Xabier Ramos,
experto en dixitalización de documentos e imaxes. Explica que o
traballo comezou o pasado mes de xullo e nestes intres “estamos a
catalogar todo o material, vendo o seu estado de conservación, as
causas da degradación dalgúns negativos e as necesidades
particulares que ten cada negativo”. Indica que a colección está
integrada por máis de 100.000 fotografías, a maioría diapositivas
de 35 mm e de 6x6 (medio formato) e placas de 4x5 pulgadas, cunha
“calidade excepcional”.
Ramos
apunta que a inxente cantidade de material de que se dispón alongará
o proceso de dixitalización. “Esixe unha gran potencia de
computación posto que en fotoquímica cando se dixitaliza a película
debe escanearse a unha cantidade de píxeles moi alta”, xa que
Xenaro traballaba en diapositiva, apenas ten fotografías en papel.
Datos
biográficos
Xenaro
fotografou algúns dos principais acontecementos históricos da nosa
terra nas pasadas décadas, por exemplo o encallamento do buque Casón
ou a primeira campaña electoral de Fraga, amais de ter realizado
sobranceiras instantáneas para a industria, campañas turísticas e
moitos catálogos de arte
Xenaro
iniciou a súa actividade profesional como fotógrafo de prensa na
década de 1980. En 1990 comeza a dedicarse á fotografía
publicitaria, en particular á industrial e á reprodución de obras
de arte para catálogos, o que representa o seu principal legado.
Así, encargouse dos catálogos do Centro Galego de Arte
Contemporánea -CGAC- desde a súa inauguración en 1993 ata o ano
2004. Tamén foi durante anos o fotógrafo de referencia da Bienal de
Arte de Pontevedra e traballou moito para o Museo de Pontevedra.
Participou en proxectos artísticos como a exposición Galicia no
tempo, en diferentes campañas do Xacobeo e turísticas da Xunta de
Galicia, ao tempo que inmortalizou moitas obras de teatro.