O Consorcio de Santiago asesorou aos propietarios dun cento de inmóbeis no plan de fibra para a cidade vella

Instalación das caixas de fibra óptica nunha imaxe de El Correo Gallego

O Consorcio de Santiago, que vén colaborando na primeira fase de despregamento da fibra óptica no ámbito do Plan Especial da Cidade Histórica, vén de facer balance desta liña excepcional de asesoramento ao servizo da veciñanza e aos propietarios que desexen contar con asesoramento institucional de cara a facer as acometidas nos inmóbeis. De feito, xa prestou axuda técnica neste asunto a propietarios dun cento de residencias e negocios.
Trátase, sinala o Consorcio, “de evitar sancións derivadas dunha execución irregular que afecte a elementos patrimoniais”, de tal xeito que unha vez realizada a solicitude de alta á compañía operadora, o usuario que o desexe pode enviar un correo electrónico ao Consorcio (oficinatecnica@consorciodesantiago.org) indicando no asunto "solicitude execución punto de acometida", engadindo o enderezo postal do inmóbel, así como a persoa de contacto e un teléfono. Unha vez executado o punto de acometida, o resto do procedemento é unha relación exclusiva entre o cliente e as operadoras.
O Consorcio explica que se trata dunha acción “relevante de face a mellorar a habitabilidade residencial e favorecer a actualización das diferentes actividades económicas, culturais e institucionais no ámbito do Plan Especial do Casco Histórico”. A liña de traballo aberta pola entidade compostelá está a ser seguida por outras cidades Patrimonio da Humanidade de España.