O Congreso Unvex servirá de privilexiado escaparate ás nosas empresas do Polo Aeroespacial
mércores, 26 de febreiro do 2020
O
carácter referencial de Galicia en materia de drons, referendado
polo Polo Aeroespacial das Rozas, no que traballan ducias de empresas
punteiras da nosa terra argallando novos e frutíferos xeitos de
tirar partido dos vehículos aéreos non tripulados, vai recibir ás
portas do verán un importante impulso. Estamos a falar do Congreso
Internacional Unvex, que se celebra entre os días 16 e 18 de xuño,
co obxectivo de mostrar ante o tecido produtivo estatal as moitas
potencialidades do dito Polo, poñendo o foco no rebulir innovador do
Centro de Investigación Aerotransportada de Rozas.
O
conselleiro
de Economía, Francisco Conde, participou este mércores na
presentación deste evento centrado nos vehículos non tripulados que
se celebrará en Santiago. Segundo fixo saber, agárdase a visita
de máis de 5000 profesionais do sector procedentes de diferentes
países.
Na
súa intervención, o conselleiro destacou que Galicia ten sabido
impulsar, a través da colaboración público-privada, “a creación
e o medre dun novo sector de alta tecnoloxía como é o aeroespacial,
que hoxe en día é estratéxico na industria da Comunidade”. Conde
puxo en valor “o traballo das empresas e startups galegas
vinculadas ao sector, os centros tecnolóxicos e as universidades,
que desde o Polo Aeroespacial de Galicia traballan para ofrecer novos
produtos e solucións innovadoras no ámbito dos sistemas non
tripulados”.
Máis
detalles sobre o evento
O
encontro Unvex 2020, no que se agarda a visita de máis de 5000
profesionais do sector procedentes de diferentes países, e a
participación de medio cento de empresas, celebrará a súa sexta
edición por primeira vez en Galicia. Segundo fixo saber hoxe o
conselleiro, os participantes terán ocasión de comprobar in situ as
capacidades do Centro de Investigación Aerotransportada de Rozas, en
Castro de Rei (Lugo). Amais do devandito, servirá para abordar as
posibilidades que ofrecen os vehículos aéreos non tripulados na
prestación de servizos públicos.
