O Concello de Verín e APETEGA presentan a edición 16 das Xornadas de Tecnoloxía
venres, 7 de abril do 2017
Esta semana
presentáronse
no consistorio de Verín múltiples detalles dunhas interesantes
xornadas que anunciaramos
previamente dende Código Cero (nos seus detalles xerais) e que
teñen como obxectivo fundamental favorecer o intercambio de
experiencias didácticas baseadas nas tecnoloxías. Trátase das
XVI Xornadas de Tecnoloxía organizadas por APETEGA
(Asociación de Profesorado de Tecnoloxía de Galicia), uns
encontros patrocinados polo Concello de Verín e que están previstos
para os vindeiros 21 e
22 de abril no centro
educativo local IES
Xesús Taboada Chivite. No acto de
presentación
participou o alcalde de Verín, Gerardo Seoane e o vicedirector do
IES Xesús Taboada Chivite, César Sánchez.
Segundo
sinalaron, as xornadas contarán cun total
de 120 prazas e teñen
como principal obxectivo “o intercambio e divulgación de
experiencias didácticas dentro das aulas e de última aplicación”.
Para iso, organizaranse
obradoiros para
profesores que tratarán
contidos sobre programación,
robótica,
impresión
3D, técnicas
didácticas de aplicación práctica na aula-obradoiro, experiencias
innovadoras para a práctica docente na área, as TIC como recurso
educativo, etc.
Na súa
intervención, Gerardo Seoane
explicou que o Concello
de Verín patrocina o acto inaugural das xornadas que terá lugar o
21 de abril, ás 16:30 horas, no auditorio
municipal.
Nesta sesión de
apertura, engadiu o alcalde, a
empresa Ceo Aberto,
experta en divulgación científica e tecnolóxica, ofrecerá a
charla-espectáculo de ciencia
De la rueda al
laser, aberta
a toda a comunidade educativa de Verín. “Desde
o Concello decidimos patrocinar este espectáculo
tecnolóxico para que todos/as os/as verineses/as poidan coñecer de
primeira man, e dunha maneira didáctica e divertida, moitas das
tecnoloxías que poderán utilizar de maneira cotiá nun futuro
próximo”, explicou Seoane.
Sánchez,
pola súa banda,
confirmou na rolda de prensa que dentro das actividades programadas
para as xornadas “ademais
dos obradoiros impartidos polos profesores, contarase
con varias conferencias didácticas nas que participarán técnicos
dos Museos Científicos de A Coruña, membros da empresa 3D_León e
representantes da empresa Prodel de Madrid, na que traballan cun
amplo abano de materiais dentro do mundo da tecnoloxía”.
A
charla-espectáculo De
la rueda al láser
será impartida por David Ballesteros, profesor e divulgador
científico de gran experiencia especializado no mundo educativo. A
sesión, sinalaron Seoane e Sánchez,
presenta un percorrido pola historia da humanidade e os cambios
tecnolóxicos máis rompedores
e decisivos, “que
permitiron
a entrada nunha nova era do coñecemento”.
Para
finalizar a charla, os participantes reflexionarán sobre as
tecnoloxías que poderemos gozar nun futuro próximo. De forma
ilustrativa, convidarase o público a xogar controlando a actividade
cun lector de ondas cerebrais conectado ao seu cerebro. As
persoas interesadas en ver o programa de actividades das xornadas,
poden descargalo en formato PDF.