O Concello de Santiago e a Xunta apostan polo equipamento común de telecomunicacións
mércores, 4 de febreiro do 2015
- Torre de Retegal en San Marcos, Santiago
A Xunta de Galicia e o
Concello de Santiago van compartir infraestruturas de
telecomunicacións. Así o fixeron saber este mércores
representantes de ámbalas administracións, por unha banda a
directora da Axencia para a
Modernización Tecnolóxica de Galicia (AMTEGA), Mar Pereira, e
pola outra o alcalde do Concello
de Santiago, Agustín Hernández, que asinaron un acordo
encamiñado a achegar sustentabilidade e rendibilidade no ámbito das
telecomunicacións locais. O convenio fixa polo tanto un
aproveitamento recíproco das instalacións e o equipamento de ambas
administracións para o desenvolvemento de redes de telecomunicacións
no municipio.
O acordo, sinalaron,
permitirá “compartir activos autonómicos e locais como torres de
antenas, canalizacións, galerías de servizos e fibra óptica,
existentes no termo municipal para favorecer a modernización das
comunicacións internas e externas de ambas administracións”.
Seguindo apuntaron, esta iniciativa conxunta xogará a prol dunha
redución importante no fornecemento de nova obra civil e
posibilitará, ademais, que o Concello de Santiago poida instalar
equipamentos de telecomunicacións municipais en infraestruturas da
Administración autonómica, ou que a Xunta de Galicia poida empregar
as canalizacións municipais para estender fibra óptica entre os
seus edificios.
A medida insírese nun
dos obxectivos da Lei 3/2013, do 20 de maio, de impulso e ordenación
das infraestruturas de telecomunicacións de Galicia que é “fomentar
a cooperación e a coordinación entre os distintos niveis da
Administración Pública, e entre estas e os operadores de
telecomunicacións, para promover despregamentos máis eficientes e
respectuosos coa contorna urbanística e o medio ambiente”.
Mar Pereira, amais
de dar a coñecer os detalles do acordo, sinalou que en Santiago, as
medidas incluídas no Plan de Banda Larga que impulsa AMTEGA
facilitaron xa o acceso á Internet (a través de redes fixas e sen
fíos), a 13.688 habitantes de 51 núcleos do termo municipal que
carecían de cobertura de Internet. “Estas actuacións”, dixo,
“supuxeron un investimento público-privado de máis de 840.000
euros e incrementaron a porcentaxe de poboación con acceso á Rede
no municipio do 85,5% a máis do 98%”.
Tamén sinalou que
a día de hoxe máis do 78% da poboación dispón de cobertura de
redes de fibra óptica que permiten velocidades de máis de 100 Mbps
e a fibra óptica está presente no polígono industriais do Tambre e
nos parques empresariais de Costa Vella e A Sionlla.