O Concello de Pontevedra lanza unha web para difundir e manter vivo o seu rico patrimonio
mércores, 18 de xuño do 2014
Seguindo na súa liña de empregar a Rede como
acubillo de coñecemento e salvagarda dos nosos pasado e identidade
(nesta
liña inseriuse precisamente A memoria das mulleres), o
Concello de Pontevedra vén
de lanzar unha web destinada a difundir o seu rico patrimonio
artístico, arquitectónico e cultural. Trátase de Tesouros
do tempo e serve entre outras cousas de catálogo de
divulgación, preservación e promoción, ao tempo que exerce de
acubillo de propostas prácticas para materializar o noso achegamento
ao devandito patrimonio.
Deste xeito, a web inclúe roteiros diversos para
percorrer Pontevedra e a súa contorna e, tamén, xanelas para
accedermos a outro tipo de patrimonio, xeralmente máis inaprensíbel:
o inmaterial. A web vén da man da Concellaría de Patrimonio
Histórico do Concello de Pontevedra e colleu corpo ao abeiro do Plan
de patrimonio rural posto en marcha pola institución en xullo e
2012. A web preséntase coma un “repertorio incompleto dos bens
patrimoniais de Pontevedra”, co que se pretende deixar claro que
estamos ante un repositorio en crecemento, aberto á participación e
sempre vivo. Os bens están estruturados en catro categorías:
arqueolóxicos, etnográficos, arquitectónicos e infraestruturas, e
a idea é incorporar en datas vindeiras o patrimonio inmaterial.