O Concello de Lugo quere instalar caixeiros nos centros sociais para reducir a fenda dixital dos maiores
venres, 25 de febreiro do 2022
O
Concello de Lugo comprometeuse a reducir a fenda dixital das persoas
maiores, agravada pola crise pandémica e, tamén, polas políticas
das entidades financeiras que levan xa tempo trasladando todos os
seus servizos ao ámbito tecnolóxico sen achegar a formación e o
asesoramento axeitado e descoidando a atención tradicional. En
concreto, a alcaldesa
Lara Méndez quere contribuír á dixitalización das persoas maiores
a través dunha rede de caixeiros automáticos nos centros sociais
municipais. A rexedora anunciou que buscará colaboración coas
entidades financeiras para conveniar a instalación destes
dispositivos, cedéndolles o espazo para instalalos.
O
anuncio obedece á vontade do Executivo local de incrementar as
dotacións a disposición da veciñanza e, neste caso especialmente,
do colectivo da terceira idade (que representa á cuarta parte da
poboación lucense) para favorecer que poidan realizar operacións de
tipo bancario en dependencias nas que ademais contarán, se así o
precisan, coa axuda do persoal municipal para levalas a cabo.
A
rexedora presentou a medida ao tecido asociativo dos e das
pensionistas que a cualificaron de excelente, “en tanto mellorará
a súa sensación de seguridade cando utilicen estes dispositivos por
atoparse en inmóbeis vixiados de maneira que poderán acceder a eles
con totais garantías”.
Lara
Méndez explicou que “durante o encontro, amosámoslles tamén a
nosa total disposición para atender as súas reivindicacións e
contribuír de xeito proactivo á súa loita, posibilitando accións
como esta e sendo receptivos ás súas demandas que igualmente lles
faremos chegar ao resto de administracións con competencias na
materia”, afirmou a rexedora.
Méndez
avanzou tamén que “dende a área de Benestar incorporarase aos
cursos de dixitalización para maiores que desenvolvemos actualmente,
formación específica vencellada ao manexo das tecnoloxías en todo
o que ten que ver, de xeito máis concreto, coas entidades
bancarias”. Trátase de obradoiros dirixidos á poboación maior de
65 anos nos que se imparte ensinanza informática para que as persoas
asistentes gañen competencias e adquiran destrezas na realización
de trámites telemáticos dentro dos que se inclúen peticións de
citas previas, a participación en vídeo-conferencias, o coñecemento
de webs informativas ou o manexo do correo electrónico e das redes
sociais.