O Concello de Cambre destinará 6.000 euros á compra de equipos informáticos
venres, 25 de xuño do 2021
O
Concello
de Cambre anunciou este mes de xuño que vai incrementar a contía
das bolsas estudo nun 33% e que este medre destinarase en parte á
compra de equipos informáticos (computadores portátiles ou de
mesa, tabletas, ratos, impresoras e USB), cos que facer fronte á
nova situación xerada pola pandemia de COVID, que fixo máis
necesaria ca nunca a dixitalización docente, tanto nas escolas coma
nos fogares.
A
incorporación desta nova contía permitirá ao alumnado “continuar
co proceso de aprendizaxe desde as súas casas, contribuíndo,
ademais, a eliminar a fenda dixital dos veciños e veciñas do
municipio”, sinalou o concelleiro de Educación e Sanidade, Miguel
Ángel Gutiérrez, poñendo o foco noutra novidade, relativa desta
volta ás persoas destinatarias desta prestación: a diferenza
doutros anos, os estudantes de Educación Especial e ESO poderán
optar á liña de compra de sistemas informáticos.
As
axudas para o curso 2021/2022 ascenderán a 24.000 euros, dos cales
6.000 servirán para financiar os gastos derivados da compra de
equipos informáticos. Neste caso, estarán dirixidas ao alumnado de
3º a 6º de Primaria, aos matriculados de ESO e aos de Educación
Especial e poderán presentarse facturas emitidas entre o 1 de
xaneiro de 2021 e o 15 de outubro.