O Clúster Audiovisual avaliará a integración de empresas galegas no exterior

O Clúster Audiovisual Galego, CLAG, ten intención de integrar dentro da súa estrutura ás empresas galegas audiovisuais instaladas no exterior para ofrecerlles os seus servizos a emprendedores galegos do sector que traballan fóra de Galicia. Para iso vai avaliar a viabilidade do proxecto e confirmar a posibilidade de levalo a cabo nos vindeiros meses.
Así o anunciou o presidente do CLAG, Antón Reixa, durante o Encontro Internacional de Empresarios Galegos en Rede á que asistiron máis de 80 representantes de empresas galegas.
O obxectivo do devandito encontro era facilitar a cooperación entre os empresarios galegos, promover a identificación e posta en funcionamento de novos proxectos e darlle pulo á Rede Virtual de profesionais de orixe galega.