O CiTIUS súmase a un proxecto europeo para transformar a acuicultura en intelixente e sustentábel
xoves, 20 de xullo do 2023
O
Centro
Singular de Investigación en Tecnoloxías Intelixentes da USC
(CiTIUS) participará ao longo dos vindeiros tres anos no novo
proxecto europeo AQUATECHInn 4.0 (Aprendizaxe dixital en
acuicultura 4.0 para a formación tecnolóxica de técnicos de
piscifactorías), un novo
consorcio financiado polo programa de axudas Erasmus+ da Unión
Europea, no que participan 14 entidades de España, Italia, Portugal,
Francia, Turquía e Grecia. Os investigadores da USC involucrados no
proxecto son Manuel Lama Penín, Alejandro Catalá, Juan Carlos Vidal
e Nelly Condori-Fernández.
Ao
longo do proxecto, que comezou oficialmente esta semana coa reunión
oficial de lanzamento celebrada en Valencia, un consorcio formado por
actores chave do sector acuícola europeo (asociacións empresariais
e empresas de acuicultura, universidades, centros de Formación
Profesional e centros de investigación con experiencia no sector)
proporá a creación do programa formativo de referencia AQUATECHInn
4.0, cuxo propósito será “aglutinar os adiantos tecnolóxicos e
produtivos máis innovadores desenvolvidos para o sector, e adaptados
á nova Industria 4.0”. Para iso, incorporará avances tecnolóxicos
como a Realidade Virtual e a gamificación.
Un
dos obxectivos principais desta nova iniciativa é “mellorar a
calidade e as competencias desenvolvidas no sector europeo da
acuicultura, incluíndo novas competencias e reducindo os desaxustes
actuais respecto ás necesidades do mercado”. AQUATECHInn tratará
tamén de que os profesionais do sector poidan achegarse aos
procedementos de diagnóstico dixital para avaliar o estado das
diferentes etapas do proceso de cultivo acuícola segundo proceda,
transformando así a acuicultura tradicional en acuicultura 4.0
mediante a promoción da aprendizaxe dixital dos procesos.
Por
outra banda, desenvolveranse tamén novos métodos educativos para
avaliar os factores que afectan os procesos de produción a través
dunha formación dixital probada, recoñecida e innovadora.
AQUATECHInn
pretende proporcionar unha mellor comprensión do uso de enfoques
dixitais baseados en recursos como os cursos de formación en liña,
a Realidade Virtual ou os escenarios de aprendizaxe gamificados
para a formación técnica no sector, así como a súa validación en
condicións reais.
Ademais,
no marco do proxecto seleccionaranse os mellores procedementos e as
mellores prácticas para o desenvolvemento tecnolóxico das
explotacións acuícolas en Europa, xerando praxes que melloren o
rendemento e fagan da acuicultura unha industria sustentábel. “Todo
iso traducirase nun alto impacto validado en todo o sector acuícola
europeo, a través do crecemento, a creación de emprego, as achegas
positivas á economía e as comunidades locais”, explicaron fontes
do CiTIUS, engadindo que o proxecto tamén servirá para deseñar,
desenvolver e compartir plataformas de aprendizaxe electrónica que
albergarán recursos educativos altamente especializados.