O CiTIUS impulsa encontros con expertos internacionais arredor do regulamento da IA

O Centro Singular de Investigación en Tecnoloxías Intelixentes da Universidade de Santiago de Compostela (CiTIUS-USC) impulsa este mes de outubro unha serie de actividades de debate e reflexión arredor do regulamento da Intelixencia Artificial, en palabras do centro “unha cuestión candente que revolucionará a forma en que as sociedades modernas interactúan coa tecnoloxía”. O programa materializíase encontros con expertos de gran prestixio, que se sumarán ao longo de tres días a un evento titulado Semana Europea pola regulación da IA.
Este workshop ten como obxectivo sensibilizar e estimular o debate relacionado co regulamento da IA, e estruturarase en tres paneis temáticos interactivos: Impacto socioeconómico da regulación da IA, Creación de confianza a través dunha IA explicable que cumpra coa regulación europea da IA e Un enfoque centrado no ser humano para unha IA non nesgada de acordo cos valores e a regulación europea.
O evento está aberto ao público e desenvolverase en modo híbrido, con asistentes presenciais e en liña, centrándose nun enfoque de múltiples partes interesadas para reunir aos representantes do sector privado, o mundo académico, a sociedade civil e os gobernos.
Os organizadores do evento anticipan que se a Estratexia Europea para a IA apróbase finalmente tal e como foi concibida, a consecuente lei será a regulación máis restritiva da IA no mundo: “O seu impacto non só nos afectará na nosa vida persoal, senón que tamén nos afectará como consumidores, empregados, empresas e administracións públicas, e mesmo a investigación neste campo", afirma o director científico do CiTIUS, Senén Barro, engadindo que “a importancia é tal que temos a responsabilidade de estar informados e mesmo de ser activos no debate e na xeración de propostas respecto diso”.
Antecedentes e obxectivos
A respecto das motivacións destes debates, o director científico do CiTIUS lembra que “a Intelixencia Artificial é a tecnoloxía máis transformadora xamais desenvolvida pola humanidade, cun impacto sen precedentes en todo o relacionado co social social, económico, laboral e de privacidade”. Neste contexto, engade, a IA está a remodelar o mundo e cambiando a vida das persoas e da sociedade, converténdose non só “nunha tecnoloxía adicional”, senón cada vez máis, “nunha parte da nosa vida cotiá”.
Debido ao seu potencial e ás innovacións de alta tecnoloxía, a IA pode achegar unha ampla gama de beneficios en todo o espectro social, económico e ambiental, explica Barro, engadindo que “ao mesmo tempo, e debido ao seu rápido crecemento e ao aumento das súas aplicacións e capacidades, a IA leva varios riscos potenciais, como conflitos sobre a privacidade, a desigualdade, a opacidade na toma de decisións, a equidade e a parcialidade ou a seguridade”.
Consciente diso, e en liña coa súa preocupación por regular adecuadamente o desenvolvemento e o uso da IA, a Comisión Europea promoveu varias iniciativas para establecer os principios dunha IA segura e digna de confianza. En 2019, o grupo de expertos de alto nivel sobre a materia presentou unhas Directrices Éticas para a Intelixencia Artificial Confiable. Dous anos máis tarde, o 21 de abril de 2021, a Comisión Europea publicou un marco normativo para supervisar a IA, establecendo normas harmonizadas sobre o tema, finalmente chamada Lei de Intelixencia Artificial.