O Centro Multimedia de Galicia emprazou este venres a futuros instaladores de TDT vía satélite

O Centro Multimedia de Galicia (CMG) situado na rúa do Hórreo de Compostela serviu de escenario hoxe a un curso formativo para instaladores de Televisión Dixital Terrestre vía satélite (SAT-TDT), tecnoloxía que entre outras vantaxes inclúe un amplo potencial para cubrir dixitalmente aquelas zonas da xeografía, moi illadas e con orografía complicada, a onde non pode chegar a TDT convencional. A xornada, informa a Secretaría Xeral de Medios (responsable do CMG e da rede de puntos de acceso na que se integra), puído seguir a través de videoconferencia nos Telecentros de Comunicación de Lugo, Allariz, A Coruña (Biblioteca Miguel González Garcés), e no da Escola Técnica Superior de Enxeñeiros de Telecomunicacións de Vigo.
A actividade, impartida por persoal técnico das compañías Abertis Telecom e Televés, foi a terceira desta índole que promove a Oficina Técnica da TDT de Galicia. A finalidade destes cursos é informar aos profesionais dos pasos a seguir na instalación dos receptores satélite da televisión dixital en áreas sen cobertura terrestre. Segundo informa a Secretaría Xeral de Medios, contar co coñecemento que achega esta acción formativa é imprescindible para poder ser distribuidor autorizado de SAT-TDT.