O Centro Demostrador TIC xa acubillou case 60 actividades de presentación
luns, 8 de xullo do 2013
O Centro Demostrador TIC, emprazado no CNTG (Conxo,
Santiago), cumpriu esta
fin de semana os seus dous primeiros anos de vida. E fíxoo
facendo reconto do acadado ao longo dese tempo (como espazo de
mostras e presentacións da innovación das nosas empresas do ámbito
tecnolóxico-dixital) e lembrando que dous anos poden dar para moito.
Máis polo miúdo, deron para acubillar un total de 57 actividades
nas que participaron case 800 empresas, actividades cun nexo común
definitorio: foron basicamente demostracións de tecnoloxías das
nosas empresas TIC dirixidas a outras empresas doutros sectores,
potencialmente demandantes, usuarias, consumidoras ou distribuidoras.
Segundo sinalan os responsábeis do Centro
Demostrador TIC (a axencia AMTEGA), este escaparate está no vieiro de cumprir o
obxectivo triplo marcado coa súa posta en marcha. Por unha banda
promover o uso das TIC entre as empresas galegas (foron
preto de 1.400 os profesionais que acudiron as demostracións e
case 800 empresas, das cales o 62% pertencen a sectores non
tecnolóxico-dixitais). Por outra banda, contribuíse a xerar negocio
TIC local, cun terzo das empresas que fixeron algunha presentación
no Centro pechando polo menos un contrato e o 41% delas recibindo
peticións de orzamentos. En terceiro lugar, achegouse a
oferta tecnolóxica ás necesidades de innovación dos sectores
estratéxicos, traballando
primeiro na
identificación desta
oferta a través do Mapa de Capacidades Tecnolóxicas de Galicia, o
MapaTIC.gal, que
a na actualidade abrangue preto de 220 provedores e máis de 530
solucións TIC.
Polo
que respecta ás novidades postas en xogo en 2013, os responsábeis
do Centro salientan a colaboración entre o CDTIC e a Rede CeMiT,
fornecendo
“a
posibilidade de seguimento a través de videoconferencia das
actividades levadas a cabo polo CDTIC para facilitar a participación
de autónomos e microPEME
de toda Galicia”.
Ademais habilitouse a posibilidade de seguir e interactuar cos
relatores e participantes nas actividades do CDTIC mediante o uso das
redes sociais.
Por
actividades postas en marcha en 2013, destacar as
Semanas TIC Sectoriais, enmarcadas dentro das accións de
sensibilización sobre a aplicación de
recursos tecnolóxicos de xestión e promoción
aos procesos produtivos da empresas, como
por exemplo a
I Semana TIC no CDTIC, orientada
ao sector téxtil e
celebrada no mes de marzo, reunindo
a máis de 131 profesionais de ambos os dous sectores (téxtil
e TIC).
Durante esta semana presentouse o Catálogo ModaTIC.gal (en
pdf),
unha mostra representativa de 40 empresas e 5 axentes de innovación
no ámbito TIC existentes
na nosa terra,
así como, un conxunto de máis de 70 produtos e servizos
tecnolóxicos específicos para o sector téxtil.
Asemade,
no
mes de abril, preto de 130 persoas asistiron ao Obradoiro
de Emprendemento TIC
para o inicio de Actividades, organizado polo Colexio Profesional de
Enxeñeiros Técnicos en Informática de Galicia (CPETIG). O
obxectivo deste obradoiro era formar a aqueles profesionais que
desexen iniciar actividades por conta propia, e para todos eles
desenvolveuse unha guía de apoio ao inicio de actividades (en
pdf).