O Campus de Pontevedra remata maio cun simposio internacional sobre os cómics na era dixital
venres, 27 de maio do 2022
O
Campus de Pontevedra vai acoller un evento internacional no que
expertos europeos e xaponeses afondarán a evolución do cómic na
sociedade dixital. O
simposio Manga in a postdigital environment celebrase os días
30 e 31 na sede da Vicerreitoría.
O
obxectivo concreto da cita será “analizar, poñendo o foco no
manga, no cómic xaponés, as transformacións formais, estéticas e
narrativas que as tecnoloxías dixitais teñen producido neste
medio”. Esta é tamén a finalidade do proxecto de investigación
Estudos transdisciplinares sobre cómic, que o grupo dx5
(digital & graphic art research) da Facultade de Belas Artes
desenvolve co financiamento do Ministerio de Ciencia e Innovación. O
simposio é, de feito, a sexa edición do Foro Internacional de
Creación na Fronteira do grupo dx5.
Como
explica o seu investigador principal, José Andrés Santiago, o
encontro internacional da semana vindeira constitúe o “evento de
peche” dun proxecto que buscaba dar resposta á seguinte pregunta:
“Que significa falar de manga neste mundo postdixital?”.
Máis
polo miúdo, a investigación pon o foco nas transformacións vividas
polo “manga como medio nunha era completamente dixital”.
Coa
participación como conferenciantes de varios dos expertos e expertas
que integran o equipo de traballo do proxecto, este foro
internacional desenvolverase o luns 30 e o martes 31 na sede da
Vicerreitoría nun “formato híbrido”, que combina as modalidades
presencial e virtual. Por unha banda, porque catro dos relatores
intervirán a través de videoconferencia e, por outra, porque este
foro aberto ao público poderá seguirse a través destas dúas vías.
En ambos casos, explica Santiago, será precisa inscrición previa a
través do correo grupodx5@uvigo.es.
Doce
conferencias, a cargo de investigadores e investigadoras de seis
países, integran o programa dun simposio que será inaugurado polo
vicerreitor do campus en funcións, Jorge Soto, e a directora do
grupo dx5, Ana Soler.
A
primeira xornada abrirase co relatorio que Santiago e a tamén
investigadora do grupo dx5 e responsábel da xestión do simposio,
Tatiana Lameiro, centrarán “no uso das tipografías no manga
contemporáneo”. A continuación, Lukas R. A. Wilde, da
universidade alemá de Tubinga falará da narrativa, mentres que o
investigador da Beykoz University turca Selen Çaliz Bedir porá en
relación o manga e a realidade virtual. Tamén nesta xornada, Olga
Kopylova, da universidade xaponesa de Tohoku, centrará a súa
intervención nos modos de publicación destes cómics e Miho
Taekuchi, da Seisa Dohto University, porá o foco en como os
dispositivos dixitais facilitaron que os autores amateurs
puidesen dar a coñecer os seus proxectos.
A
continuación, a investigadora Dalma Kálovics, do museo do manga
Yakote Masuda, analizará como os formatos e deseños estandarizados
do cómic xaponés trasladáronse ao ámbito dixital, mentres que
Jaquelne Berndt, da Universidade de Estocolmo, proporá na súa
conferencia “revisitar os proxenitores do manga desde unha
perspectiva postdixital”. Por último, esta primeira xornada
pecharase cun relatorio da investigadora da Kyoto Seika University
Bon Won Koo sobre “a adaptación do manga ao formato webtoon”.
Xa o
martes, Per Israelson, da universidade sueca de Linköping, abordará
este medio desde unha perspectiva “poshumansita”, mentres que
Stevie Suan, da Hosei University, centrarase na “transnacionalidade”
da animación xaponesa. Por último, Nicolle Lamerichs, da
Universidade de Ciencias Aplicadas de Ultrecht, abordará o impacto
que o desenvolvemento dixital tivo na distribución do manga, e
Zoltan Kacsuk dará a coñecer o proxecto de estudo sobre manga e
anime a partir de metadatos que levan a cabo na Stuttgart Media
University.