O Campus de Pontevedra acollerá un hackathon para incorporar contidos ao Galizionario
venres, 2 de novembro do 2018
O
Galizionario,
como iniciativa colaborativa que é, xurdida ao abeiro dos novos
xeitos de traballar en rede, precisa de nós para ampliar fondo e
radio de acción. En
base a isto, dende o Campus de Pontevedra (Universidade de Vigo)
veñen de convocar o que sería o primeiro maratón colectivo
dirixido a incorporar contidos á plataforma. A cita será o 16
de novembro, na Facultade de Ciencias da Educación e do Deporte.
Para quen non o saiba, o Galizionario foi posto en marcha en 2004 e é
a versión galega do dicionario Wiktionary, acubillo de coñecemento
construído coas contribucións das usuarias e usuarios. O
Galizionario ten a día de hoxe máis de 53.000 entradas. O obxectivo
é facelas medrar tanto como sexa posíbel.
A
cita de Pontevedra, a Emlex Wiktionary Hackfest, estará aberta á
participación de calquera persoa interesada, aínda que o groso das
colaboraras e colaboradores prevese que sexan estudantes das nosas
universidades e do norte de Portugal. A quedada está a ser
coordinada polo profesor da dita facultade Carlos Valcárcel e
insírese nas actividades do mestrado europeo en lexicografía Emlex.
Tamén se conta co apoio da Vicerreitoría do Campus.
A
xornada abrirase cos relatorios de Adrián Estévez, un dos
administradores do Galizionario, e de Eneko López, co-responsábel
da edición en éuscaro do Wiktionary e colaborador tamén da edición
en castelán. “Serán unhas charlas moi prácticas, o que queremos
é que nos expliquen que hai que facer para editar e que é preciso
ter en conta para que a xente poida comezar a andar, porque a idea é
que estean todo o día editando xuntos”, sinala Vacárcel dunha
actividade que, tras estes coloquios e a organización dos grupos de
traballo, terá como eixo a incorporación de novos contidos ao
Galizionario, para pecharse cunha sesión de posta en común do
traballo de cada grupo.
Co
fin de impulsar o traballo conxunto e colaborativo, o comité
organizador do evento (do que tamén forman parte Adrián Estévez e
as docentes María José Domínguez, da USC, e Idalete María Silva,
da Universidade de Minho), achegará a este hackathon
unha serie de propostas para o traballo da edición, que abranguen
desde a introdución de léxico ligado á época do ano presente (o
outono) á incorporación de traducións a outros idiomas neste
dicionario multilingüe.
A
participación tamén está aberta a aquelas persoas que non poidan
vir a Pontevedra pero que queiran sumarse editando desde as súas
casas.