O Campus de Ferrol acubillará en xullo un obradoiro de robots e videoxogos para rapaces de 16 anos
mércores, 3 de xuño do 2015
O Campus de
Ferrol (Universidade de Coruña) vai acoller un obradoiro de
programación de robots e videoxogos. A actividade, dirixida a mozas
e mozos, celébrase baixo a metodoloxía de “aprender xogando”,
tal e como fai saber o profesor da Escola
Politécnica Superior Francisco Bellas, impulsor
deste obradoiro encamiñado a rapaces de 16 anos. O obxectivo,
sinala, é favorecer que coñezan “o
que hai detrás dalgúns dos seus xogos preferidos como Lego
e Minecraft”.
A
iniciativa desenvólvese os días 13 e
24 de xullo no Campus de Ferrol.
Toda a documentación, dispoñíbel
en formato pdf.
Os contidos básicos do obradoiro son
os seguintes: programación en Scratch e Minecraft, robótica con
Lego Mindstorms e mOway, iniciación á enxeñaría con Lego Wedo e
Arduino e “algunha outra sorpresa”, engaden os organizadores.
Como dixemos, o principal obxectivo
deste taller estival é que os nosos adolescentes aprendan de forma
lúdica, “fomentando valores como o traballo en equipo e a
creatividade así como a resolución de problemas”. A maiores,
búscase achegarlles recursos para expoñer as súas ideas en
público.
Poderán participar nesta iniciativa
todos os interesados, sexan ou non da comunidade universitaria, que
se inscriban entre o 4 e o 24 de xuño. O obradoiro celebrarase no
Edifico de Talleres Tecnolóxicos do Campus de Ferrol de 9:00 a 14:00
horas.
Esta iniciativa,
organizada pola Fundación Universidade da Coruña, conta coa
colaboración das empresas Gehon Consulting e Tech Academy for
Kids and Teens.