O CPETIG fixo un balance positivo do pasado exercicio durante a súa Asemblea Xeral
martes, 3 de xullo do 2012
O Colexio Profesional de Enxeñería Técnica en Informática
de Galicia (CPETIG), creado mediante Lei do Parlamento no ano 2006, celebrou durante
a pasada fin de semana a súa Asemblea Xeral Ordinaria, na que, entre outras
cousas, se presentou para a súa aprobación o orzamento para este ano 2012, que
achega unha previsión de gasto de preto de 17.000 euros.
Nesta cita anual, celebrada no Gran Hotel de Santiago de
Compostela, o presidente da entidade, Marcos Mata, aproveitou ademais para
facer balance das contas e das actividades do 2011, e tamén dou conta dos
contactos mantidos coas Administracións e Universidades.
Tamén se fixo un repaso polos contidos e novidades que
achega a nova web da entidade, moito máis funcional e atractiva por certo, e informouse
sobre o proceso de modificación
estatutaria no que está inmerso o CPETIG, do que afirman que “xa se presentou ao Consello de Colexios
Oficiais de Enxeñaría Técnica en Informática e do que se está a agardar o seu
informe”, engaden.
A convocatoria
serviu, asemade, para tratar e ditar as liñas estratéxicas de actuacións a seguir
polo CPETIG no vindeiro exercicio, para o que se recibiron, da man dos participantes,
propostas de actividades a desenvolver nos anos vindeiros, na opinión do equipo
directivo, “moi interesantes” .