O CPETIG celebra en Lugo unhas xornadas sobre informática xudicial
martes, 6 de setembro do 2011
- O CPETIG celebrou recentemente en Santiago un seminario sobre certificados dixitais
O Colexio Profesional de Enxeñaría Técnica en Informática de Galicia, CPETIG, vai seguir traballando no achegamento
á nosa terra de toda a información máis recente relativa aos procesos
desenvolvidos por xuíces, maxistrados, fiscais ou avogados que teñan relación
directa coas novas tecnoloxías. Con este fin, e logo das actividades de
divulgación celebradas en Santiago sobre este mesmo eido, o Colexio vaise a
Lugo para desenvolver, entre os días 15 e 16, un Seminario sobre Informática Xudicial, Peritaxe Técnica e Proba Electrónica.
A actividade, que se celebra en horario de tarde, das 17 ás 21 horas, ten o
seguinte obxectivo: informar e concienciar aos xuristas dos avances en materia
probatoria nos casos en que entre en xogo o elemento informático.
Asemade, informa o CPETIG, buscarase con este seminario “sensibilizar sobre a axuda que poden prestar
os peritos informáticos nas causas xudiciais e as claves de valoración da proba
informática”.
Como dixemos, os beneficiarios potenciais da actividade son xuíces,
maxistrados, secretarios xudiciais e fiscais. A acción formativa
desenvolverase no Salón Madeira do Hotel
Méndez Núñez da capital lucense (Rúa da Reina, 1) e será inaugurada, pola
subdirectora xeral de Sistemas de Información e Modernización da Administración
Pública, María José García Sexto, e polo presidente do CPETIG, Marcos Mata.
Programa
O evento, a desenvolver en dúas xornadas, contará coa participación dalgúns
dos máis reputados expertos en materia de TICs e procesos policiais e xudiciais
de todo o territorio estatal.
Na primeira xornada, a que se desenvolverá o vindeiro xoves 15 de setembro,
o primeiro relatorio correrá a cargo do avogado Victor Salgado, socio do Bufete
Pintos&Salgado, que abordará o tema do Dereito
das novas tecnoloxías.
Esta xornada completarase coa conferencia do fiscal especializado en Criminalidade
Informática da provincia de Pontevedra, Luis María Uriarte, que abordará o tema
da proba electrónica e a súa importancia no proceso xudicial.
A segunda xornada, que se vai desenvolver o venres 16 de setembro, contará
coa presenza do Xefe do Grupo de Delitos Telemáticos da Comandancia da Garda
Civil en Pontevedra, Gonzalo Sotelo, que disertará sobre a o protocolo forense
en probas electrónicas.
Esta segunda xornada formativa completarase co relatorio do perito do Corpo
Oficial de Peritos do Colexio Profesional de Enxeñería Técnica en Informática
de Galicia (CPETIG), Miguel Abal, que abordará na súa intervención o tema da
práctica pericial informática.