O CPETIG celebra en Compostela as II Xornadas de Informática Xudicial e delitos Informáticos

O Colexio Profesional de Enxeñaría Técnica en Informática de Galicia, na súa teima por poñer de manifesto a importancia que teñen as novas tecnoloxías aplicadas ao eido das peritaxes informáticas e as técnicas probatorias, está a organizar as II Xornadas de Informática Xudicial e Delitos informáticos, que terán lugar en Santiago de Compostela os vindeiros 11 e 12 de novembro.
Con esta acción formativa, o ente colexial busca informar aos xuíces e maxistrados do país dos avances que se teñen acadado en materia probatoria no caso de delitos informáticos, así como sensibilizar sobre a axuda que poden prestar os peritos informáticos nas causas xudiciais.
As xornadas, que terán lugar no Hotel AC Palacio del Carmen, contarán cun completo programa de relatorios e mesas redondas, e no prezo da matrícula (60 euros) inclúese material para as sesións e un diploma de asistencia.
Na xornada do venres, 11 de novembro, os relatorios correrán a cargo do maxistrado e director do Servizo de Modernización e Organización Xudicial do Consello Xeral do Poder Xudicial, Joaquín Delgado Martín, así como da avogada e socio director de Razona Legaltech, Paloma Llaneza; para rematar coa mesa redonda, Estamos preparados para dar seguridade xurídica a un mundo xa dixital?, na que se tratarán máis polo miúdo os detalles do asesoramento en delitos informáticos.
Os relatores convidados á xornada do sábado día 12 son Eloy Velasco, xuíz da Audiencia Nacionalo, Elvira Tejada de la Fuente, fiscal xeral en Criminalidade Informática e Jorge Martín García, inspector xefe do Grupo de Análise de Software da sección de Informática Forense da Policía Nacional.
A xornada completarase coa mesa redonda, Retos da xustiza ante a nova realidade informática.
A web do CPETIG achega máis información ao respecto, así como a ligazón para formalizar a matrícula.