O CPEIG imparte no CHUS un obradoiro de robótica para os nenos hospitalizados
mércores, 2 de xaneiro do 2019
A
formación tecnolóxica dos nosos profesionais non cesa co novo ano,
máis ben amplifícase e vólvese aínda máis solidaria. Co
obxectivo de xerar vocacións entre as novas xeracións e, tamén, de
achegar lecer, novos horizontes, divertimento e oportunidades para
quen nestas datas máis precisa deles e delas, o
Colexio Profesional de Enxeñaría en Informática de Galicia (CPEIG)
impartirá este 3 de xaneiro un obradoiro de robótica e pilotaxe de
drons no Complexo Hospitalario Universitario de Santiago (CHUS).
A cita, dirixa ás nenas e nenos hospitalizados, desenvolverase de
11:00 a 13:00 horas.
A
xornada insírese na estratexia de compromiso do CPEIG co fomento do
talento dixital dos nenos e nenas de toda Galicia. “O taller”,
sinala o colexio que preside Fernando Suárez, é “unha
oportunidade para achegarse de forma lúdica e divertida á
tecnoloxía e á enxeñaría en informática”. A xornada estará
impartida polo enxeñeiro en Informática Manuel Montesinos Miguélez
e o enxeñeiro de Obra Civil Telmo López López. Segundo avanza o
propio Montesinos facendo referencia ao miolo temático da actividade
e a súa finalidade, “os máis pequenos poñerán en práctica o
seu talento dixital, desenvolvendo competencias persoais como a
creatividade e o interese pola ciencia e a tecnoloxía”. Por outra
banda, a actividade tamén servirá de xerme para que a rapazada
participante poida experimentar novas calidades e comece a
interesarse polas novas tecnoloxías.