O CPEIG aposta polo uso da informática verde para mitigar o cambio climático
xoves, 3 de febreiro do 2011
Dado o avanzado
estado de degradación no que se atopa xa a nosa capa de ozono, e o consecuente
quencemento global que está a provocar, o pouco que se poida facer para
contribuir a mitigar o cambio climático benvido sexa.
Malia que pouco
poden facer para correxir os malos hábitos de consumo da cidadanía, o Colexio
Profesional de Enxeñaría en Informática de Galicia (CPEIG), sabedor de que a
aposta polo uso de enerxías renovables xunto coa reciclaxe é o máis consecuente
que ten á súa man para tratar de manter en bo estado o medio ambiente, vén de
asinar un acordo de colaboración coa Asociación pola Eco-responsabilidade nas
Tecnoloxías da Información e Comunicación (Aecotic) polo cal lle dan pulo ás
actividades e iniciativas relacionadas coas green
IT, é dicir, a informática verde.
Ao abeiro deste convenio,
ámbalas dúas entidades acordan colaborar no impulso das green IT con iniciativas e actividades “baseadas no concepto amplo da informática verde”, de xeito que o CPEIG
intégrase como socio institucional de Aecotic durante un prazo de dous anos,
renovables por acordo entre ambas partes.
Mediante este
acordo, asinado entre Manuel Carlos Delfino Reznicek, presidente de Aecotic, e
Fernando Suárez Lorenzo, presidente do CPEIG (na imaxe), ambas entidades
pretenden impulsar iniciativas, individuais e colectivas, que contribúan a mitigar
o cambio climático unindo un uso eficiente das tecnoloxías da información e
comunicación; así como sensibilizar a sociedade, empresas e Administración
pública na redución das emisións de CO2; potenciar novas tecnoloxías TIC
enerxeticamente sustentables; impulsar a sustentabilidade en áreas intensivas
en utilización das TIC; impulsar un centro de referencia internacional sobre
políticas, acción e tecnoloxías green IT
e propiciar a adopción de medidas de reciclaxe e reutilización.