O CPEIG achega claves para regular a eAdministración nos concellos
mércores, 25 de marzo do 2015
O presidente do Colexio Profesional de Enxeñaría
en Informática de Galicia, Fernando Suárez, presentou recentemente
o modelo de ordenanza tipo que foi desenvolvido polo colexio man a
man coa Federación Galega de Municipios e Provincia, a FEGAMP. A
presentación levouse a cabo nun encontro sobre eAdministración
celebrado o pasado 16 de marzo, e no transcurso da xornada deuse
a coñecer o miolo da ordenanza, facendo fincapé en detalles como
cara a onde se dirixe (cara a regular a Administración Electrónica
os concellos) e de que maneira (impulsando o emprego dos medios e as
canles electrónicas no desenvolvemento da actividade administrativa
dos mesmos).
Fernando Suárez tamén subliñou que o devandito
impulso TIC abranguerá tanto a relación dos gobernos locais coa
cidadanía coma a relación coas restantes administracións públicas,
“de acordo co establecido no artigo 45 da Lei 30/1992, do 26 de
novembro, de réxime xurídico das administracións públicas e do
procedemento administrativo común, desenvolvido pola Lei 11/2007, do
22 de xuño, de acceso electrónico da cidadanía aos servizos
públicos”. O texto atinxe, entre outras, as seguintes actuacións:
a tramitación dos procedementos administrativos incorporados á
tramitación telemática; a creación do rexistro electrónico e a
regulación do seu funcionamento; unha especificación dos trámites
e procesos que poderán ser iniciados a través do rexistro
electrónico así como a fixación dos principios reguladores para a
incorporación de novos trámites e procedementos administrativos; a
prestación, por medios informáticos, de servizos de información e
de atención á cidadanía polos distintos órganos e unidades
administrativas do concello.
Tamén se achegan claves para regular as relacións
coas demais administracións e entidades públicas en tanto en canto
actúen como usuarias dos servizos ou ben como parte interesada nos
procedementos incluídos no ámbito de aplicación do concello.