O CNTG e CoreNetworks achegan en novembro un seminario técnico sobre Big Data e Hadoop
xoves, 17 de outubro do 2013
Da
man do Centro
de Novas Tecnoloxías de Galicia e a empresa
CoreNetworks,
socio
oficial de formación Cloudera,
o vindeiro día 6 de novembro, de 9:30 a 13:30 horas, terá lugar no
salón de actos do CNTG un seminario técnico sobre introdución a
Big Data e Hadoop. A
xornada está deseñada para dar a coñecer as tecnoloxías clave
deste software en concreto, trasladar aos asistentes como funciona
HDFS MapReduce e introducir no desenvolvemento de aplicacións
MapReduce. Este seminario diríxese sobre todo a desenvolvedores con
coñecemento e algunha experiencia en linguaxes de programación,
principalmente en Java e, en xeral, persoal técnico interesado en
adquirir coñecementos sobre a materia. Non son precisos coñecementos
previos en Hadoop.
Lembrar,
para que non o saiba, que o concepto Big Data (grandes datos) é o
termo que designa o conxunto de tecnoloxías
e aplicacións de negocio que interveñen na captura, tratamento e
análise de cantidades voluminosas de datos estruturados e
desestruturados (blogs, redes sociais etc..) obtidos de diferentes
fontes e polo regular
en tempo real. Apache
Hadoop, pola súa parte, é un software con aplicacións libres que
achega soporte para o
procesamento de todos os tipos de datos (estruturados,
semiestruturados ou non estruturados) “e a posibilidade de
ampliación aberta de Hadoop permite aos desenvolvedores enriquecelo
con capacidades especializadas para unha ampla gama de aplicacións”,
informa o CNTG. Por
último, sinalar que Cloudera é un fabricante de software que
fornece as
certificacións asociadas a Big Data e Apache Hadoop.
O
relator da xornada será Arnauld Delanoue, instrutor oficial de
Cloudera.
Segundo nos conta en
detalle o centro de tecnoloxías compostelán, Arnauld
Delanoue é enxeñeiro de informática e está en posesión, entre
outras, das certificacións Cloudera
Certified Developer for Apache Hadoop, Cloudera Certified
Administrator, Cloudera Certified Specialist in Apache HBade
(onde acadou a puntuación máis alta a nivel mundial) etc ...
Actualmente é formador de Apache Hadoop para Europa e Latinoamérica.
O
acceso ao seminario, previa
inscrición a realizar en liña a través do portal web do CNTG,
é de balde e condicionado ao aforo do local. O acceso ao salón de
actos para aquelas persoas non
inscritas estará condicionado á existencia de prazas libres o día
de celebración do evento.