O CNTG acolle este sábado un encontro sobre a diversidade funcional nas canles da información
venres, 21 de outubro do 2011
O Centro de Novas
Tecnoloxías de Galicia vai acoller este sábado, a partir das 11 da
mañá, unha
xornada sobre o tratamento informativo que se lle dá á cuestión
da diversidade funcional. O acto, que se dirixe a fomentar entre os
profesionais da comunicación (e tamén entre os lectores) diversos
recursos e metodoloxías para desenvolver a cuestión da
discapacidade, sen discriminacións e con puntos de vista
integradores, vén da man da Secretaría Xeral de medios e o Comité
de Entidades de Representantes de Persoas con Discapacidade en
Galicia (CERMI-Galicia).
O secretario xeral de
Medios, Alfonso Cabaleiro Durán, e o presidente de CERMI-Galicia,
Anxo Queiruga, serán os encargados de inaugurar o encontro, na que
tamén participará a secretaria xeral de Política Social, Coro
Piñeiro, e no que a presentadora da TVG Irene Lamas actuará de
condutora.
A iniciativa insírese na
participación da Secretaría Xeral de Medios no Plan de Acción
Integral para as persoas con diversidades funcionais 2010-2013 da
Xunta, e responde “á necesidade de fomentar o trato da cuestión
sen excepcionalidades e de que todos os profesionais do xornalismo
tomen conciencia ao respecto”.
Participará como
conferenciante o xornalista Juan Antonio Ledesma, presidente da
Comisión de Imaxe Social da Discapacidade e Medios de Comunicación
do CERMI estatal, e os asistentes recibirán unha Guía de Boas
Prácticas sobre o tratamento da discapacidade, editada en formato de
lectura doada e en braille.