O CLAG viaxa a Ámsterdam para comprobar as vantaxes das TIC aplicadas ao audiovisual
xoves, 10 de setembro do 2009
Unha delegación de dez empresas galegas,
formada por Dygra Films, Voz Audiovisual, Lambdastream, Spica, Popular TV, CTV,
Continental Producciones, Arantia, TV7-Setemedia e Enxebre Entertainment, viaxa
hoxe a Amsterdam para asistir ao International Broadcasting Convention,
IBC, un evento que se celebra do 10 ao 15 de setembro e que reúne aos
profesionais máis recoñecidos do momento no sector das novas tecnoloxías
aplicadas ao audiovisual.
Esta misión, promovida polo CLAG dentro
do seu Plan de Internacionalización do sector, ten como obxectivo, segundo
veñen de anunciar os seus responsables, “situar
ás empresas audiovisuais de Galicia neste foro considerado de referencia internacional
no ámbito da radiodifusión, dos compoñentes electrónicos, da televisión e das
tecnoloxías multimedia aplicadas á comunicación”. No seu conxunto, a
delegación empresarial galega desprazase ao IBC interesada en descubrir novas
solucións tecnolóxicas e contactar con proveedores de equipamento para TDT,
tecnoloxía HD ou 3D estereoscópica, entre outros.
O periplo galego á cidade holandesa obedece
a un dos obxetivos preferentes do CLAG de estimular o proceso de
internacionalización do sector, mediante programas que axuden ás empresas a
acceder a novos mercados e a explorar modelos emerxentes de negocio derivados
dos novos desenvolvementos tecnolóxicos. Neste senso, o IBC é unha
oportunidade para coñecer os últimos desenvolvementos tecnolóxicos aplicados ao
sector audiovisual, polo que será unha plataforma para que as empresas
galegas descubran as últimas tendencias en asuntos clave para a súa actividade,
tales como os cambios no comportamento das audiencias nas diferentes
plataformas e tipos de pantallas, as novas pautas na creación e consumo de
contidos ou os novos modelos no negocio da emisión. Durante as sesións do
IBC, abordaranse temas estructurados en tres áreas: avances tecnolóxicos,
creación e innovación de contidos e o negocio da emisión. Os participantes,
asemade, coñecerán os novos modelos de negocio que emerxen dos últimos
desenvolvementos tecnolóxicos, compararán experiencias de estudos sobre os
compoñentes tecnolóxicos e obterán respostas no campo da IPTV ou a HD, as novas
tendencias na creación e consumo de contidos, as novas técnicas de produción
para estimular a audiencia…