O CITIC recibe o Recoñecemento á Inclusión en Galicia
martes, 25 de outubro do 2022
O
Centro
de Investigación en Tecnoloxías da Información e das Comunicacións
(CITIC) da Universidade da Coruña recibiu o pasado venres
o Recoñecemento á Inclusión en Galicia. Foi no transcurso dun
evento organizado pola Confederación Galega de Persoas con
Discapacidade (COGAMI) e a Fundación Integralia DKV, celebrado no
Centro Sociocultural Ágora da Coruña.
Os
galardóns recoñecen “o compromiso de particulares, empresas,
centros especiais de emprego e institucións que contribúen día a
día á inclusión sociolaboral das persoas con discapacidade en
Galicia”.
Concretamente,
o CITIC, a través do seu subdirector, Javier Pereira, recibiu a
distinción na categoría Administración con Alma.
Pereira
no seu discurso de agradecemento afirmou o seguinte: “No CITIC,
como centro de investigación no ámbito tecnolóxico, buscamos
sempre deseñar unha tecnoloxía que sexa máis accesible, sempre
facendo fincapé no deseño universal da tecnoloxía. Agradecemos
este recoñecemento e estamos orgullosos de achegar o noso graniño
de area para buscar unha sociedade máis inclusiva”.
Ao
acto, conducido pola directora da Fundación DKV Integralia, Cristina
González, asistiron diversas autoridades, entre elas, a conselleira
de Promoción do Emprego e Igualdade da Xunta, María Jesús
Lorenzana; o presidente da Confederación de Empresarios de Galicia,
Juan Manuel Vieites; a concelleira de Igualdade, Benestar Social e
Participación do Concello da Coruña, Yoya Neira; o director de
Comunicación e Responsabilidade Empresarial de DKV Seguros, Miguel
García Lamigueiro; e o presidente de COGAMI e COCEMFE, Anxo
Queiruga. Este último destacou “a importancia dos recoñecementos
que hoxe se entregan, pola visibilidade que supoñen e a posta en
valor do talento das persoas con discapacidade e a súa contribución
xunto coas entidades, empresas e institucións para a construción
dunha sociedade inclusiva”.
Ademais
do CITIC, tamén foron premiados pola súa labor o doutor Antonio
Rodríguez Sotillos, xefe da Unidade de Lesionados Medulares do
CHUAC, Iago Santalla pola Traxectoria á Diversidade Profesional,
Aixiña CEE, e a empresa Arnoia Distribución de Libros, entre
outros.