O CITIC pon os seus recursos tecnolóxicos ao servizo da Federación Española de Enfermidades Raras
xoves, 20 de xullo do 2023
O
reitor da Universidade da Coruña, Julio Abalde, e o presidente da
Federación Española de Enfermidades Raras (FEDER), Juan Carrión,
asinaron este 19 de xullo un convenio de colaboración para fomentar
o intercambio de experiencias e de persoal nos eidos da docencia, a
investigación e a cultura especialmente no relativo a estas
patoloxías. Boa
parte deste traballo collerá corpo a través do Centro de
Investigación TIC da UDC, o CITIC.
Ambas
as entidades buscan afianzar desta maneira unha colaboración
académico-científica que terá unha duración de mínimo catro anos
e que porá o foco na participación en programas de investigación,
en formar ao persoal asistencial de FEDER e do seu movemento
asociativo, así como en intercambiar coñecemento.
A
colaboración previa entre as dúas institucións traduciuse xa en
experiencias e en asesoramento arredor de tecnoloxías e produtos de
apoio, así como en Sistemas Alternativos e Aumentativos da
Comunicación (SAAC), formando ás entidades, pacientes e familias.
O
reitor manifestou a súa satisfacción pola sinatura deste acordo de
transferencia de coñecemento e valorou “a axuda que supón poñer
as Tecnoloxías da Información e a Comunicación ao servizo do
avance da sociedade”. E engadiu: “As institucións públicas
temos que estar para avanzar e é unha honra vincularnos a este
proxecto e a esta entidade”.
Pola
súa banda, o presidente de FEDER explicou que esta colaboración
permitirá mellorar a autonomía dos nenos e nenas. Carrión asegurou
que a alianza coa UDC “fortalécenos e permítenos avanzar” e
recoñeceu que no tema das doenzas raras “a investigación é o
noso futuro e esperanza”.
Á formalización do acordo asistiron ademais Thais Pousada, doutora en ciencias da
saúde, terapeuta ocupacional e enfermeira, profesora da UDC e
investigadora do CITIC, e membro do comité asesor de FEDER; Manuel
González Penedo e Javier Pereira, director e subdirector,
respectivamente do CITIC; Fide Mirón, vicepresidenta de FEDER, e
Santiago de la Riva, vicepresidente de Fundación FEDER.
Trala
rúbrica, os representantes de FEDER visitaron o CITIC para coñecer
en primeira persoa a investigación e o desenvolvemento tecnolóxico
levado a cabo pola Universidade, así como a súa aplicabilidade ás
persoas con enfermidades raras.
FEDER
vén traballando nos últimos anos na accesibilidade e a formación
vinculadas coa tecnoloxía de apoio, especialmente en SAAC e produtos
de acceso ao computador e dispositivos móbiles, recursos dirixidos a
aquelas persoas que, pola súa enfermidade, necesitan dispositivos ou
programas especiais para poder comunicarse.
Nesta
liña, durante a visita ao CITIC puideron probar algúns dos
dispositivos impulsados desde este centro de investigación, como o
desenvolvemento de contornas personalizadas de Realidade Virtual para
a rehabilitación ou o deseño e creación de produtos de apoio en
3D, e que poden poñerse ao dispor do colectivo de persoas con
enfermidades raras ou en busca de diagnóstico en Galicia.
Estímase
que a nivel autonómico o colectivo estea integrado por máis de
200.000 persoas. Con todo, aínda que a Universidade e o CITIC
atópanse situados en Galicia, o convenio aspira a chegar a toda a
xeografía española, permitindo que tanto a comunidade profesional
como pacientes e familias poidan acceder a estes recursos,
especialmente enfocados na comunicación de todas as persoas como
ferramenta para a participación social.
Como
dixemos, a colaboración entre FEDER e a Universidade da Coruña era
xa unha realidade previamente grazas á implicación de Thais Pousada
dentro do Comité Científico Asesor do Servizo de Información e
Orientación de FEDER. Trátase dun órgano no que a doutora en
Ciencias da Saúde vén colaborando desde a súa constitución, en
2013, xunto a outros 25 expertos especializados en temas clínicos,
farmacolóxicos, científicos ou sociais como a terapia ocupacional
que axudan á federación para dar resposta a determinadas consultas
sociosanitarias e casos sen diagnóstico que recibe a organización.