O CITIC desenvolve un enchufe intelixente que evita incendios e prevén as electrocucións
martes, 29 de abril do 2014
O CITIC, Centro de
Investigación en Tecnoloxías da Información e as Comunicacións da Universidade
da Coruña, desenvolveu Smart Socket,
un enchufe intelixente orientado á prevención de sobreconsumos e curtocircuítos. Creado
polo Área Tecnolóxica
Sistemas de Comunicacións Sen Fíos este enchufe pódese controlar
remotamente por un móbil, tablet ou PC, tanto os seus diferentes parámetros
como o mesmo dispositivo.
Entre as aplicacións que inclúe atópase cortar o subministro
de corrente a dispositivos que provoquen un sobreconsumo o que evita que se
produzan danos graves no propio trebello e prevén que se produzan incendios. Polas
súas características e innovación aportada no seu desenvolvemento, solicitouse
patente de Smart Socket na Oficina Española de Patentes e Marcas, garantindo a
súa calidade.
Segundo Tiago Fernández Caramés, investigador do CITIC responsable
de Smart Socket, “este enchufe intelixente non só ten entre as súas vantaxes a
seguridade que aporta; tamén favorece o aforro enerxético e a eficiencia xa que
controla o seu consumo e no caso que se detecte un comportamento anómalo, lanza
alertas a través de distintos medios como alarmas sonoras, envío de SMS ou
email”.
Outros beneficios de Smart Socket
Smart Socket prográmase de xeito personalizado, cada usuario
pode configurar o seu funcionamento como o emprego en determinadas franxas
horarias, establecer que dispositivo son válidos para ser enchufados… Permite
monitorizar en tempo real o consumo eléctrico do enchufe, así como obter o
histórico do consumo que se realizou.
Ata se desconecta de xeito automático de dispositivos con
consumo pantasma, aqueles conectados permanentemente á rede ou que se atopan en
situación de standby como
televisores, ordenadores, DVD… Estímase que este consumo eléctrico se
sitúa entre o 7 e o 11% dun fogar medio.
Ademais, grazas ao seu sistema de identificación
intelixente de dispositivos, prevén as electrocucións, un aspecto moi
destacable para vivendas con nenos pequenos dado que o sistema só fornece
corrente en canto se conecta un dispositivo que o sistema considera válido.