O CITIC acolle unha xornada sobre como favorecer o retorno de investigadores
mércores, 12 de xuño do 2019
O
Centro de Investigación TIC
(CITIC) da Universidade da Coruña acolle este xoves 13 de xuño,
a partir das 10:00 horas, a xornada Retornando
talento emigrado organizada xunto co Consello Social da UDC.
O obxectivo do evento é poñer en valor a mobilización
internacional do persoal docente e investigador e, sobre todo, o
impulso de iniciativas que fan posíbel o regreso destes profesionais
para transferir o coñecemento e excelencia a súa universidade e
país de orixe.
A
xornada terá lugar na Sala Cloud do CITIC e contará coa presencia
do reitor da Universidade da Coruña, Julio Abalde, o presidente do
Consello Social da UDC, Antonio Abril Abadín, e o director do CITIC,
Manuel F. González Penedo, para inaugurar a xornada. No seu
transcurso, varios expertos reflexionarán e analizarán o fenómeno
da emigración do talento para potenciar o seu retorno.
Entre
estes expertos atópase o director do Centro de Regulación Xenómica
(CRG), Luis Serrano Pubul, que trasladará aos presentes a
experiencia de SOMMa, que constitúe a alianza de centros e unidades
de excelencia Severo Ochoa e María de Maetzu (entre os que se atopa
o Centro Nacional de Biotecnoloxía do CSIC) e busca incrementar a
visibilidade nacional e internacional da ciencia en España.
A
continuación, o vicerreitor de Política Científica, Investigación
e Transferencia da UDC, Salvador Naya Fernández, presentará
InTalent, un programa específico de colaboración entre a
Universidade dá Coruña e Inditex para a contratación de
investigadores post-doutorais con proxección e ampla traxectoria
internacional baixo o criterio da excelencia.
Baixo
o título O coñecemento é a unidade básica para xerar benestar,
o director xeral de Ikerbasque, Íñigo Atxutegui Basagoiti,
compartirá os principais fitos da Fundación Vasca para a Ciencia.
Logo, o director de ICREA, Antonio Huerta Cerezuela, centrará a súa
intervención na estratexia da Institución Catalá de Investigación
e Estudos Avanzados para facer posíbel a contratación do persoal
científico e académico máis extraordinario e de maior talento.