O CITIC presentará os seus proxectos durante o foro Transfiere

O Centro de Investigacións TIC da Universidade dá Coruña (CITIC) participará os días 13 e 14 de febreiro na segunda edición de Transfiere, o gran foro multisectorial de I+D+i en España que fomenta a cooperación entre o ámbito científico e o empresarial. Xunto á presentación dos seus proxectos, o CITIC ofrecerá unha conferencia no marco do Speaker Corner sobre algunhas das investigacións que desenvolve no ámbito TIC.
Polas oportunidades e posibilidades que ofrecen este tipo de foros e encontros, o CITIC, centro tecnolóxico impulsado pola Universidade da Coruña, participa de xeito activo presentando as ofertas e proxectos de I+D. A organización prevé que este ano participen máis de 250 empresas e institucións, 200 grupos de investigación e 48 universidades españolas, así como a celebración de 2.600 encontros B2B.

O foro Transfiere xunta a axentes do I+D+i de toda España

Segundo Xesús M. Díaz, responsable de Promoción Tecnolóxica do CITIC e representante do Centro en Transfiere, "como punto de encontro entre a Universidade e a Empresa, dende o CITIC traballamos de xeito continuo na presentación dos nosos proxectos a empresas para promover a colaboración e a transferencia de coñecementos. Durante os dous días de duración de Transfiere achegaremos os nosos proxectos co obxectivo de darlles saída no ámbito empresarial".
Aproveitando a súa estanza na cidade de Málaga o CITIC manterá unha serie de reunións con diferentes organismos andaluces, entre os que se inclúe a que manterá cos responsables da Área de Innovación e Novas Tecnoloxías do Concello de Málaga, unha das cidades españolas onde o proxecto SmartCity está máis desenvolvido, co fin de analizar posibles colaboracións no ámbito das smartcities. Dende o CITIC estanse a levar a cabo iniciativas nesta liña como o PIMUS, Punto de Información Intelixente para a Mobilidade Urbana Sostible, presentado como proxecto piloto para o Concello da Coruña.