O CESGA organiza unha nova sesión para coñecermos as posibilidades do FinisTerrae II
venres, 29 de marzo do 2019
O
FinisTerrae
II, o supercomputador do Centro de Supercomputación de Galicia
(CESGA), vai ser obxecto esta primavera dunha nova sesión de
divulgación sobre as importantes potencialidades de seu. A
cita será o 23 de abril, en horario de mañá, das 10.00 ás 13.00
horas, na propia sede do CESGA no Campus Sur de Santiago. A
sesión está dirixida a usuarios noveis ou potenciais usuarios do
computador FinisTerrae II, co obxectivo de que “coñezan o equipo e
aprendan a usalo para as súas propias aplicacións ou para as que
estean dispoñíbeis”.
Como
lembraremos, o supercomputador é empregado na actualidade por centos
de empresas e investigadoras/es da nosa comunidade científica para a
resolución das máis complexas operacións ligadas ao cálculo
avanzado ou ao tratamento do Big Data (información a gran
escala).
Os contidos da actividade incluirán un bloque
introdutorio sobre arquitectura clúster e descrición de hardware e
un achegamento pormenorizado á metodoloxía empregada para acceder
ao FinisTerrae II, para facer uso do sistema de colas (que é?, por
que é necesario?, cales son os seus límites?, etc) e para tirar
proveito das súas moitas aplicacións (software instalado, petición
de novos programas, uso das aplicacións, execución de traballos
simples).
O FinisTerrae II entrou en produción hai agora dous
anos, incrementando de maneira notábel as prestacións do servizo de
cálculo do CESGA. O novo supercomputador é un sistema de cálculo
avanzado baseado en procesadores Intel Haswell e interconectado
mediante rede Infiniband (FDR@56Gbps con topoloxía Fat-tree) cun
rendemento pico de 328 teraflops e sostido en Linpack de 213
teraflops.