O CESGA mostra como optimizar aplicacións avanzadas de cómputo con programas libres
venres, 28 de setembro do 2018
O
Centro de
Supercomputación de Galicia (CESGA) vai organizar unha actividade
formativa para sacar o máximo rendemento das ferramentas de cálculo
de alto rendemento (HPC polas súas siglas en inglés). O curso,
que porá o foco no eido das aplicacións libres, ten o obxectivo de
“proporcionar ao alumnado un adestramento básico no emprego de
recursos libres destinados á análise e optimización de código
secuencial e paralelo”, segundo informan fontes do CESGA, que
engaden que entras ferramentas a avaliar no obradoiro atópanse as
desenvolvidas no BSC (Barcelona Supercomputing Centre), Paraver,
Extrae e Dimemas, ademais de ferramentas clásicas “moi útiles”
para a optimización como Gprof ou Callgrind/Valgrind, todo iso sobre
os compiladores GNU.
O
curso celebrarase os días 19, 20 e 21 de novembro de 2018 en horario
de 9:00h a 14:00h no CESGA. O programa inclúe (entre outras moitas
cousas) formación sobre como optimizar código examinando as
principais alternativas nos compiladores GNU, unha introdución ás
arquitecturas modernas e ás posibilidades da paralelaxe do código,
recursos sobre as distintas alternativas libres dispoñíbeis para a
depuración, análise e optimización de código ou información
sobre as oportunidades de paralelaxe de código utilizando memoria
compartida ou memoria distribuída.
Os
encargados de impartir estes e outros contidos serán Diego Andrade e
Basilio Fraguela, investigadores e profesores do Grupo de
Arquitectura de Computadores da Universidade da Coruña, con máis
dunha década de experiencia achegando docencia e investigando en
temas relacionados coa análise e a optimización do rendemento de
aplicacións, tanto en contornas secuenciais como paralelas.