O CESGA busca empresas manufactureiras para realizar experiencias de simulación
xoves, 14 de novembro do 2013
- Javier García Tobío, director do CESGA
O Centro de
Supercomputación de Galicia (CESGA)
vén de informar dunha nova iniciativa na que está a traballar,
achegando a súa longa experiencia en recursos de cálculo,
eficiencia e formación, unha iniciativa centrada desta volta nun
ámbito claramente empresarial. Máis polo miúdo, do que se trata é
de convocar pequenas e medianas empresas interesadas en realizar
experiencias de simulación co fin de que entren en contacto cos
especialistas do CESGA, que lles axudarán na preparación das súas
propostas para acceso a bolsas de financiamento. O centro galego
informa que coordinará a presentación de propostas de enxeñarías
e industrias de España e Portugal. Estas empresas disporán de
acceso “ás meirandes estruturas de computación en Europa e aos
mellores expertos en computación e simulación para avaliar o seus
problema”, engade o CESGA.
Para os investigadores do
centro galego a simulación é unha ferramenta clave para a
competitividade das empresas. Nisto, coinciden punto por punto co
establecido no programa de Factorías do Futuro da Comisión Europea,
que tamén engade o potencial de ámbitos como a robótica no
desenvolvemento das nosas PEME. Este convencemento da Comisión
levouna a crear a iniciativa I4MS (ICT Innovation for
Manufacturing SMEs, en galego Innovación TIC para as PEME
Manufactureiras) a través da que está a financiar diversos
proxectos demostradores e avaliadores das posibilidades que estas
tecnoloxías ofrecen. Dentro deste programa, precisamente, o centro
de infraestruturas e servizos CESGA, o centro tecnolóxico AIMEN e a
empresa de enxeñaría Texas Controls participan no proxecto
Fortíssimo.
Entre outras responsabilidades, o CESGA encárgase de coordinar a
preparación de propostas de experimentos por parte de PEME españolas
e portuguesas.
Lembrar que Fortíssimo é
un servizo paneuropeo de cómputo de altas prestacións na nube para
empresas. O proxecto financia experiencias innovadoras para
contribuír ao deseño e a demostración do potencial dun conxunto de
servizos de computación de altas prestacións na nube. O seu
obxectivo principal é facilitar á industria manufactureira europea,
sobre todo PEME, o beneficio das vantaxes competitivas e de
eficiencia do uso da simulación. “Isto”, explica o CESGA,
“conseguirase a través da provisión de servizos de simulación
baseados nunha infraestrutura cloud sobre contornas de
computación de altas prestacións (HPC)”.
Fortíssimo, neste senso,
fará accesíbeis os servizos avanzados de simulación para usuarios
industriais, empregando o concepto de portelo único, onde o
hardware, o software, o coñecemento técnico, a visualización e as
ferramentas ficarán accesíbeis de xeito doado. Arestora están a
executarse 20 casos de uso industrial. Fortíssimo busca neste intre
máis experiencias para investigar e amosar os servizos de simulación
para empresas manufactureiras e de enxeñaría. Para iso, abriuse
este mes de novembro unha convocatoria de novos experimentos cun
financiamento total de 5 millóns de euros e cun financiamento por
caso de 250.000 euros. As empresas interesadas en propor proxectos de
uso e acceder a este financiamento podar contactar con CESGA a través
de fortissimo@cesga.es. Tamén se lles informa que teñen á súa
disposición webinars públicos que se celebrarán a semana
vindeira, o mércores 20 de 11:00 a 12:00h e o xoves 21 de 17:00 a
18:00h.