O CESGA achegará recursos tecnolóxicos ao proxecto Innopharma
mércores, 2 de abril do 2014
O Centro de Supercomputación de Galicia (CESGA) apoiará
cos seus sistemas de supercomputación a busca de novos fármacos que a
Universidade de Santiago está a levar a cabo no marco do proxecto Innopharma. Esta iniciativa
inclúe a creación dunha plataforma de farmacoxenómica que une as capacidades
das Plataformas de Xenómica e de Cribado de Fármacos da universidade, liderados
polos doutores Ángel Carracedo e Mabel Loza, respectivamente.
O obxectivo de Innopharma é suplir a falta de transferencia
entre os centros de coñecemento e o mercado en Galicia. Desta forma, mediante o
establecemento de colaboracións estratéxicas entre os ámbitos público-privados
do sector biofarmacéutico, Innopharma pretende potenciar este sector en Galicia
e convertelo nun referente internacional no ámbito do descubrimento temperán de
fármacos.
A iniciativa permite ampliar as súas capacidades
tecnolóxicas dos departamentos universitarios, pero á vez esta tecnoloxía xera
un gran número de datos que é necesario almacenar, ordenar e, sobre todo,
xestionar, co fin de que o persoal investigador poida acceder a esta
información de forma rápida e eficiente. É neste labor no que o CESGA apoia ao
proxecto, do que se informou nun acto ao que asistiu o director da Axencia
Galega de Innovación, Manuel Varela.
En concreto, proporciona o soporte necesario en tecnoloxías
da información para que Innopharma poida deseñar e prestar os seus servizos dun
xeito escalable, eficiente e seguro, proporcionando tanto a infraestrutura
tecnolóxica como o soporte técnico requirido.
Tamén posibilita que estes servizos teñan acceso á
capacidade de computación, almacenamento e comunicacións necesaria para
proporcionar tempos de resposta axeitados á importancia do proxecto. Dende o
punto de vista da seguridade da información, o apoio do CESGA permite dotar a
estes servizos de proteccións avanzadas que garantan a confidencialidade da
información, a protexan de accesos non autorizados, e, por último, que garantan
a súa recuperación en caso de fallo, así como a súa preservación.