O CESGA achega recursos para acadar unha pesca máis substentábel
luns, 17 de setembro do 2018
Poden
as tecnoloxías de vangarda, baseadas na análise do Big Data,
no modelado e no cómputo de alto rendemento, salvar o medio
ambiente? A resposta, segundo nos
lembrou a semana pasada dende Vigo Marine Instruments, e segundo
nos recorda o
CESGA hoxe dende Santiago, é positiva. Ou, polo menos, todo
apunta a que debera selo, polo que cómpre favorecer a obtención de
recursos para que así sexa. Un exemplo disto é o proxecto no que
está a traballar un equipo do Instituto
de Ciencias Marinas de Andalucía (ICMAN), co soporte do Centro
de Supercomputación de Galicia (CESGA), e que achega respostas
concretas ao problema da sobre-explotación pesqueira nunha contorna
concreta.
A
través deste proxecto, as dúas entidades desenvolveron e puxeron en
práctica un modelo matemático que permite describir o estado da
anchoa ou bocarte (unha especie que estivo a piques de desaparecer en
2006) no Golfo de Cádiz e prognosticar o seu futuro. Segundo explica
o centro galego, este traballo foi validado polo comité europeo de
expertos que subministra a visión científica aos políticos para
asesorar ao Parlamento Europeo.
O
traballo que están a desenvolver o ICMAM e o CESGA apóiase nunha
preocupante e demostrábel realidade: o mar esgótase, e moitas
especies están ao bordo do colapso. Neste punto, o problema agrávase
cando non hai parámetros nin metodoloxías exactas, pormenorizadas,
que acheguen pautas de valor para as autoridades encargadas de
permitir ou prohibir a captura de determinadas especies, de que
forma, en que áreas ou en que época do ano. Porén, os modelos
matemáticos cobren estas eivas, achegando ferramentas para calcular
a cantidade de peixes e debuxar un mapa do estado de cada area
pesqueira, segundo explican dende o CESGA, salientando a importancia
destes datos para que “as institucións políticas regulen a pesca
de cada especie, garantindo que sexa sustentábel”. A clave, neste
senso, está en “asegurar que un número de individuos sexa quen de
reproducirse con éxito para a seguinte tempada, e que, ao mesmo
tempo, a actividade sexa rendíbel para o sector pesqueiro”.
Os
traballos a desenvolver
O
modelo matemático en cuestión veu da man do Grupo de Oceanografía
de Ecosistemas do Departamento de Ecoloxía e Xestión Costera do
ICMAN-CSIC, formado por unha ducia de científicos. O modelo serve
para determinar o traballo do Consello Internacional para a
Exploración do Mar (CIEM o ICES), o comité europeo de expertos que
asesora cientificamente ao Parlamento Europeo. A cota desta pesquería
do sur decidirase en base aos cálculos probados polo equipo
especializado en asesoría para a xestión da pesca.
A
creación do modelo foi posíbel, tamén, grazas aos servizos do
CESGA. Segundo explica Margarita Rincón, “Cada proba do modelo
precisa catro horas de cálculo a máxima velocidade. Nun ordenador
normal sería infinitamente máis. Se cadra unha operación imposíbel
de realizar. Cada vez que cambio un parámetro nun modelo ábrense
moitas posibilidades e hai que realizar un cómputo simultáneo”,
expresa Rincón, que engade que sen os sistemas e a tecnoloxía do
centro galego, o proxecto dificilmente tería chegado a bo porto.
Segundo
engade, a versión elixida polo ICES foi a número 59. E explica:
“Para chegar ao modelo final houbo 58 modelos previos, coas horas
de supercómputo que implica. Cada un consta dunhas celas por idades
e por talles, dende unha poboación inicial estimada. A isto hai que
ir engadindo a taxa de crecemento, a mortandade natural por pesca, a
taxa de reprodución… e ir completando as celas. A actualización
permite ver a evolución da pesqueira e atopar os mellores parámetros
para que a cantidade de individuos estimada de anchoa sexa
consistente con toda a información que se posúe para predicir o que
acontecerá no futuro”, engade a científica.
As
autoridades europeas transmitirán agora a través deste modelo a
cota de bocarte no Golfo de Cádiz axeitada para a vindeira campaña.
O modelo elaborado polo ICMAN-CSIC co apoio do CESGA sintetiza, para
iso, o ciclo de vida dos peixes “tendo en conta a influencia do
ecosistema e o efecto da pesca”. Segundo explica o centro galego,
“a fórmula matemática converte ecuacións en beneficios para a
sociedade e o coidado do medio ambiente”.