O CDTIC prosegue a súa actividade con seis novas sesións formativas online en abril
martes, 14 de abril do 2020
O
Centro Demostrador TIC da axencia AMTEGA está a desenvolver estes
días un intenso programa formativo: unha completa axenda de xornadas
online para ampliar o coñecemento e as capacidades dos nosos
profesionais (autónomos, PEME) en tempos de pandemia e crise
sanitaria. As sesións serán achegadas até finais de abril en
streaming, da man de diversos axentes tecnolóxicos da nosa
Comunidade. Baixo o formato #DemosXweb, búscase “fomentar o
teletraballo e tratar diversos aspectos de utilidade á hora de
adoptar esta modalidade de traballo na casa”.
Este
tipo de accións colleron impulso co inicio do Estado de Alarma e,
segundo informa o CDTIC, proseguirán nas vindeiras semanas de
confinamento, con máis actividades de balde e en streaming,
nas que imos poder participar a
través da web do Centro Demostrador ou nas súas apps de
Android e iOS.
Para
esta mesma semana están programadas unha sesión sobre comercio
electrónico para este martes 14 de abril, que impartirá Hacce;
outra de fomento do teletraballo con Microsoft Teams, mañá, día
15, a cargo de Captology; e, por último, unha sobre recomendacións
de ciberseguridade e privacidade para o xoves 16 da man da consultora
APDTIC. Todas elas están previstas en horario de 10:00 a 10:45.
Ademais,
desde o CDTIC xa se está a traballar para ofrecer, ao longo do mes,
máis sesións por streaming para “axudar durante o período
de confinamento”. Trátase dunha sesión de xestión documental con
Docuten para o 22; outra de ciberseguridade con Computer-3, o día
23; e outra de marketing automático o 29.
Cinco
actividades con récords de participación
Desde
a entrada en vigor do Estado de Alarma celebráronse cinco
actividades que tiveron unha grande acollida e nas que, segundo
informou a Axencia para a Modernización Tecnolóxica de Galicia
(AMTEGA) “batéronse récords de inscrición neste tipo de
demostracións en liña”. A elevada participación traduciuse en
feitos como as numerosas preguntas polo chat que foron atendidas no
momento, coma se se tratase dunha sesión presencial, por parte dos
relatores. Para quen non puido seguir en directo estes seminarios, na
web do CDTIC están dispoñíbeis para a súa visualización nun
apartado específico da páxina do centro.
A
última destas sesións antes da Semana Santa foi Mellora a túa
comunicación corporativa con Rocket.Chat, retransmitida o 8 de
abril e impartida por Queres Tecnologías. Un día antes, o 7 de
abril, Christian Delgado falou do uso de WhatsApp na empresa e no
comercio, unha sesión na que se afondou no emprego profesional ou
mesmo comercial e as boas prácticas desta rede social e na que se
alcanzou unha participación récord.
Por
outra banda, organizáronse tres sesións dedicadas a temas
relacionados co teletraballo: Anubía impartiu, o día 3 de abril, o
seminario Xestión de proxectos integrada en OdooERP
teletraballando; o 2 de abril, Sistemius abordou os aspectos
legais do teletraballo; e o 24 marzo foi a quenda da empresa Dotcom
Factory con Teletraballo simple e xa con G-Suite de Google.
Emerxencia
sanitaria COVID19
A
emerxencia sanitaria do coronavirus forzou a moitas empresas a
recorrer ao teletraballo. A Axencia para a Modernización Tecnolóxica
de Galicia, a través do CDTIC, quere “servir de guía para
favorecer esta modalidade de traballo” publicando diariamente unha
entrada sobre diferentes ferramentas que poden ser de utilidade a
todas as persoas que, na actualidade, están recorrendo a esta
práctica. Podemos
acceder a todas estas publicacións a través doutro apartado do
CDTIC.