O CCII prepara unha nova edición do curso en liña sobre o Dereito na Rede
venres, 1 de marzo do 2013
O Consello de Colexios
de Enxeñeiros en Informática (a versión estatal do noso CPEIG,
no que, por certo, tamén se integra o colexio galego) está a
presentar estes días unha nova edición do seu curso en liña
Aspectos legais de Internet e das TIC, unha actividade
encamiñada a achegar
contidos e metodoloxías de traballo relacionados co Dereito no eido
da Sociedade da Información. Por exemplo: cales son os límites
de uso e exposición de datos alleos, propiedade intelectual,
regulamentos para o comercio electrónico, etc. O CCII, para que a
máxima cantidade de profesionais poida tirar partido da actividade,
ten en marcha unha serie de descontos importantes para os alumnos que
pertenzan aos colexios que integran o Consello. Este curso, informa o
CPEIG, conta coa experiencia real de realización no colexio galego,
cunha boa valoración ao respecto. Agora, o CCII recolle a testemuña
para que sexa de aproveitamento en tódalas entidades estatais.
Os beneficios aplicaranse
tanto a membros colexiados coma a pre-colexiados, para o cal haberá
que indicar a entidade de pertenza no formulario de matricula. O
prazo de inscrición remata o 1 de abril. Respecto aos contidos
propiamente ditos da actividade, dicir que se trata dun curso
fundamentalmente práctico, aínda que tamén hai teoría, e que
entre outras cousas fornece aos profesionais dunha completa e
actualizada análise da xurisprudencia, ou sexa, das sentenzas
xudiciais vinculadas ao eido TIC, non só en España, senón tamén
en Europa. Os destinatarios son enxeñeiras/os en Informática
integradas/os no CCII ou nos colexios territoriais correspondentes. O
director do curso é Pablo García Mexía (Madrid, 1964), profesor de
Dereito e Goberno de Internet no College of William & Mary
(Virginia, EE.UU.) e letrado das Cortes Xerais.
A continuación damos
conta do programa:
· Semana do 8 ao 14 de
abril de 2013. A Regulación da Rede. Bases e Novas Tendencias (Big
Data, Cloud Computing, Internet das Cousas...). 4 Horas. Prof. Dr.
Pablo García Mexía.
· Semana do 15 ao 21 de
abril de 2013. Implicacións Legais das Telecomunicacións
(Operadores, Redes, Servizo Universal...). 4 Horas. Prof. Dr. López
Álvarez.
· Semana do 22 ao 28 de
abril de 2013. Protección de Datos (Réxime vixente e Proxectos
europeos). 4 Horas. Prof. Villarino Marzo.
· Semana do 29 de abril
ao 5 de maio de 2013. A Propiedade Intelectual na Rede (Copyright,
Redes P2P, Streaming...). 4 Horas. Prof. Dr. Bondía Román.
· Semana do 6 ao 12 de
maio de 2013. Internet e Propiedade Industrial (Nomes de dominio,
Marcas, AdWords...). 4 Horas. Prof. Dr. García Mexía.
· Semana do 13 ao 19 de
maio de 2013. Dereito do Comercio Electrónico (Contratos en Liña,
Publicidade online, Consumo...). 4 Horas. Prof. Villarino Marzo.