O CCG difunde na Rede a biografía e a voz e Laxeiro, homenaxeado no Día das Artes
venres, 1 de abril do 2022
O
Consello da Cultura Galega sumouse ás celebracións deste 1 de
abril, Día das Artes Galegas, convocada pola Real Academia Galega de
Ciencias, e
faino con dúas contribucións á divulgación de José Otero
Abeledo, Laxeiro,
homenaxeado na dita xornada. A primeira destas achegas é a
incorporación da entrada sobre o
pintor lalinense no Álbum de Galicia, a gran enciclopedia
online do CCG na que se recompilan os nomes e as vidas das
galegos e os galegos que contribuíron ao progreso cultural,
histórico, científico, social, económico ou político da nosa
terra. A segunda é a publicación de tres gravacións sonoras nas
que se pode coñecer ao pintor na súa voz e que se integran dentro
do proxecto Voces
Centenarias. Trátase de dúas entrevistas e unha charla
realizadas entre 1983 e 1988 que chegan desde o Fondo de RNE e da
Colección Antón Mascato que custodia o Arquivo Sonoro de Galicia.
Unha
delas foi realizada polo xornalista Manuel Lombao e nela repasa a
traxectoria vital de Laxeiro: Cuba, Bos Aires, Madrid, Vigo e Lalín,
espazos onde desenvolve o seu labor pictórico. O segundo dos audios
é de 1988, consiste nun encontro público de
Laxeiro co gallo da súa exposición no Quiosco Alfonso da
Coruña. O terceiro dos cortes é unha entrevista que Antón Mascato
lle fai a Laxeiro na cafetería Goya de Vigo en 1983 para a revista
Can sen dono.
Laxeiro,
no Álbum de Galicia
Javier
Pérez Buján asina a entrada de Laxeiro no Álbum de Galicia.
Nela destaca as dúas grandes influencias da infancia do lalinense: a
súa avoa, que lle imprimiu o gusto polas personaxes pintorescas e a
gran capacidade de fabulación; e a súa mestra, dona Teresa, quen
espertou a súa vocación pictórica. Despois fai un percorrido
cronolóxico polos lugares da súa historia: primeiro a Habana a onde
emigrou con 13 anos e de onde regresaría catro anos despois, enfermo
de tuberculose e disposto a morrer na súa terra; segundo Madrid, a
onde se trasladou para ingresar na Real Academia de Belas Artes de
San Fernando cunha bolsa do concello de Lalín, que prolongaría
grazas a unha bolsa da Deputación de Pontevedra. Logo, a súa volta
a Lalín, imbuído do ambiente republicano da época, cando realiza
as súas primeiras pinturas, consideradas tamén as primeiras
expresionistas da arte galega. Para logo continuaren en Vigo e Bos
Aires, onde se desenvolveu profesionalmente e saíu do illamento ao
tempo que se abriu ás tendencias internacionais do momento.