O CCG combate cun amplo menú cultural o confinamento derivado do COVID-19
luns, 16 de marzo do 2020
Ante
a pandemia de COVID-19 e a necesidade de adaptarnos a novos hábitos
de traballo, de lecer e de acceso ao coñecemento, o
Consello da Cultura Galega reforzou a súa vertente dixital co
obxectivo, nas súas palabras, de “poñer a disposición do público
contidos culturais”. O abano de recursos postos en xogo terá
amplitude abonda: información da actualidade cultural, difusión do
fondo documental do CCG (recursos sonoros, epistolarios, materiais
dixitalizados sobre patrimonio, emigración ou lingua, entre outras
temáticas), primeiras aproximacións estatísticas sobre o impacto
socicultural do coronavirus, etc. Estes serán algúns dos contidos
que o CCG achegará estes días aos internautas: contidos galegos de
interese... e en galego.
O
fornecemento de material, que se complementa coa adopción do
teletraballo no seo da institución (proceso formalizado a semana
pasada co fin de contribuír a paliar o avance do virus), levarase a
cabo a través das webs corporativas (consellodacultura.gal
e culturagalega.gal) e
das redes sociais. A través destas canles difundiranse novos
contidos (publicacións, especiais, proxectos...) e adaptaranse para
a Rede algúns dos formatos co obxectivo “de ofertar á cidadanía
novos contidos culturais”, informou o CCG.
Suspensión
da actividade presencial
En
virtude das recomendacións das autoridades galega e central, o
Consello da Cultura Galega suspendeu a actividade presencial da
institución. Iso traduciuse na cancelación dos eventos previstos no
mes de marzo como xornadas, presentacións, reunións de traballo e
roldas de prensa. Con todo, a institución decidiu reforzar a
difusión dixital, segundo informou a institución “un dos piares
da institución desde hai máis de dúas décadas”.
O
devandito implicou a posta en marcha dun programa que se desenvolverá
as vindeiras semanas e que se traducirá no medre da oferta de
contidos culturais online. Ao abeiro desta iniciativa,
dixitalizaranse e poranse en valor materiais relevantes para a
cultura galega en diferentes ámbitos, publicaranse informes e outros
documentos informativos e adaptaranse para a Rede algunhas
iniciativas que deixaron de ofrecerse en formato presencial.
Seguindo
este fío, esta semana divulgarase material complementario de dúas
xornadas celebradas nas últimas semanas, unha das cales é O
estado da danza a debate.
O
CCG explica que a maior parte destas actividades retransmítense en
directo desde a nosa canle de Youtube.
Amais,
continuará operativo o portal de divulgación cultural
Culturagalega.gal.
No
que se refire ás publicacións, o Consello da Cultura Galega lembra
que conta cun acubillo dixital que pon a disposición do público
máis de catrocentos títulos de libre descarga de temáticas que van
desde a ciencia ata a igualdade, pasando pola antropoloxía,
emigración, lingua, literatura ou filosofía.
Con
respecto ao fornecemento de fondos documentais, subiranse novos
exemplares dixitalizados do semanario A Nosa Terra, unha
iniciativa que se sitúa na área de dixitalización de cabeceiras
representativas da cultura galega. No ámbito sonoro destaca a
difusión do patrimonio sonoro dixitalizado en pedra, Proxecto
Lousas.
Amais,
entre outras moitas iniciativas online previstas
para estes días, o Consello da Cultura Galega mostrará a súa
colección de exposicións, que permite acceder desde a casa aos
paneis de mostras recentes como Inventio mundi, que recolle a
contribución galega ás expedicións oceánicas entre os séculos XV
e XVIII, ou a mostra de fotografías Os adeuses, que documenta
os últimos momentos da emigración galega en barco cara á América.
En total, pódese acceder virtualmente a 21 títulos doutras tantas
temáticas.