O CCG amosará a historia da nosa terra a través dunha mostra, unha app e máis unha páxina web
luns, 25 de abril do 2016
- Manolo Gago será o comisario da mostra que se inaugura o vindeiro 10 de maio
O Consello
da Cultura Galega, coa colaboración de AFundación e Abanca, vai
organizar unha mostra dirixida a visualizar en detalle os principais
referentes e sinais de identidade da nosa cultura, o que máis nos
define, mediante unha escolma de obras de toda índole. A
exposición Galicia 100 Obxectos para contar unha cultura
construirá, en palabras do CCG, “un relato histórico do país a
través da selección e da relación de cen pezas procedentes de
institucións, empresas e coleccionistas de Galicia e do exterior”.
Inaugurarase o 10 de maio na sede de AFundación (rúa do Vilar, 19)
en Santiago. A exposición contará tamén cunha publicación en
papel, aplicación para dispositivos móbiles, así como unha web que
aposta polo uso de aspectos interactivos na dixitalización do
patrimonio. A TVG amosará diariamente (desde o luns 25) unha escolma
das pezas seleccionadas.
Respecto
do período cronolóxico que se vai abranguer coa exhibición, será
todo o referente á nosa historia como pobo: dende o Paleolítico
Inferior até os anos 90 do século pasado. O miolo da mostra estará
constituído por un centenar de obxectos seleccionados “pola súa
capacidade de explicar aspectos da identidade, o territorio, a
sociedade e a cultura galegas e os seus cambios ao longo do tempo”,
explica o CCG, que engade que a exposición non presentará “un
discurso temporal ao uso”, senón que procurará “que as pezas
dialoguen entre si e co visitante a través de épocas e grandes
conceptos”.
A exposición Galicia
100 está comisariada
por Manuel Gago e disporá dun consello asesor de destacados
especialistas encabezado por Ramón Villares e que contou coa
participación de Carlota Álvarez Basso, José Miguel Andrade
Cernadas, Fernando Bouza, Felipe Criado Boado, Guillermo Escrigas,
Lourenzo Fernández Prieto, Pegerto Saavedra e Dolores Vilavedra.
Máis de sesenta institucións, empresas e coleccionistas de Galicia
e do exterior participaron no proxecto do Consello da Cultura Galega
facilitando o acceso aos obxectos. Entre os principais
referentes-antecedentes da proposta está, por exemplo, a actividade
recente do Museo Británico e da canle BBC Radio 4, que en 2010
encetaron unha iniciativa, A History of the world in 100 objects, que
tiña como obxectivo “facer visual” a historia do mundo a través
dunha escolma de elementos-acontecementos especialmente
significativos e definitorios.