O Banco de Reciclaxe Electrónica de Ames organiza un obradoiro sobre seguridade dixital
martes, 27 de setembro do 2022
A
Oficina de Voluntariado Informático de Software Libre de Ames, xunto
co seu Banco de Reciclaxe Electrónica, dá continuidade este mes de
outubro á súa programación de obradoiros que comezou no pasado mes
de xullo. Sen
ir máis lonxe, o sábado, 1 de outubro, de 11.00 a 13.30 horas,
impartirase no edifico do antigo centro de saúde do Milladoiro un
obradoiro sobre seguridade dixital básica. Encádrase nas
actividades de divulgación tecnolóxica da Oficina para os grupos
sociais menos favorecidos, poñendo o foco nas posibilidades dos
programas non privativos.
Na
sesión aprenderase sobre conceptos básicos da seguridade dixital,
para poder usar os nosos ordenadores e smartphones dunha forma
mellor e máis segura. As
persoas que queiran participar poden confirmar a súa asistencia
premendo na ligazón específica habilitada.
A
Oficina de Software Libre e o Banco de Reciclaxe Electrónica de Ames
é un proxecto posto en marcha pola Oficina de Voluntariado de Ames e
a Asociación de Empresas Galegas de Software Libre (AGASOL). Algún
dos seus obxectivos son “minorar o lixo electrónico, aumentar a
vida útil destes aparellos e reducir o seu consumo”. Este proxecto
botou a andar no pasado mes de maio. O primeiro obradoiro realizouse
en xullo para a reparación e reciclaxe de altofalantes.
En
setembro comezaron os obradoiros do segundo semestre deste ano cun
taller de posta a punto, reciclaxe e instalación de computadores que
segundo lembra o Concello de Ames, “tivo un grande éxito de
participación”. Mostrouse como instalar un sistema operativo
libre, un navegador, unha suite ofimática, un reprodutor de audio e
vídeo ou un programa de edición de imaxes dixitais, etc.
A
programación de obradoiros continúa este sábado, 1 de outubro, en
horario de 11.00 a 13.30 horas, cun taller sobre seguridade dixital
básica, que se vai impartir no edifico do antigo centro de saúde do
Milladoiro, na rúa Agro do Medio, número 8.
Entre
os obxectivos da Oficina de Voluntariado Informático de Software
Libre de Ames, xunto co seu Banco de Reciclaxe Electrónica, está
reducir a fenda dixital para os colectivos vulnerábeis e minorar o
lixo electrónico no municipio.