O BNG pide executar os fondos europeos destinados a eliminar a fenda dixital
luns, 1 de marzo do 2021
O
Bloque Nacionalista Galego expuxo este luns o seu punto de vista
sobre o estado actual da conectividade na nosa terra e as fendas dixitais que, segundo indicou a agrupación, seguen vixentes. Ao
abeiro desta cuestión, o BNG lembrou que están dispoñíbeis unha
serie de fondos europeos para eliminar as desigualdades tecnolóxicas
entre uns concellos e outros, entre unhas contornas e outras, e
instou a executalos canto antes.
A
portavoz do BNG en Europa, Ana Miranda, defendeu que se executen “sen
dilación” os distintos fondos europeos que a UE pon a disposición
dos Estados Membros para mellorar a conectividade: “Galiza é a
segunda comunidade do Estado con menor implantación da banda larga,
pero a fenda dixital agravouse durante a pandemia e provocou unha
maior crise económica, exclusión social e incomunicación,
especialmente nas zonas rurais”, denunciou Miranda dende Gondomar,
durante unha reunión mantida coa concelleira do BNG Manuela
Rodríguez Pumar e representantes da Plataforma Gondomar Fibra Xa,
para abordar a situación deste concello.
Dende
esta Plataforma explicaron que “existe un problema de alimentación
desde o nodo da Ramallosa a Gondomar que é a que permitiría
alimentar a rede de distribución, que xa está despregada, pero que
non vai máis alá dun 20 ou un 30% das parroquias”. E engadiron:
“Esa alimentación daría a posibilidade de seguir implementando a
distribución da fibra, unha vez que estivese operativa a
alimentación principal, e favorecería a conexión das persoas que
actualmente contan con ADSL ou outras conexións, actualmente
saturadas”.
A
portavoz do Bloque en Europea engadiu “que non só existen fondos
para garantir a conectividade, imprescindíbel nestes tempos, senón
que segundo a normativa europea, os Estados membros deben garantir
que todos os consumidores poidan dispoñer a un prezo accesíbel dun
acceso adecuado a Internet de banda larga”.