O 8% das empresas españolas xa usan Intelixencia Artificial
mércores, 26 de xaneiro do 2022
Sen
pausa e máis axiña do que se agardaba, as tecnoloxías disruptivas
máis directamente vencelladas á xestión e análise do coñecemento
(Intelixencia Artificial, aprendizaxe das máquinas, aprendizaxe
profunda, etc) están a gañar presenza en empresas de todo tipo, e
dun xeito fluído e en procesos de transformación doados de adoptar.
Segundo
un novo estudo do Observatorio Nacional de Tecnoloxía e Sociedade
(ONTSI), o informe Uso de tecnoloxías dixitais por empresas en
España, o 8% das
firmas estatais xa fan uso das ferramentas vencelladas ao concepto
IA. Os eidos onde ten máis protagonismo a Intelixencia Artificial
son os seguintes: procesos de produción, mercadotecnia e
vendas.
O
informe sostén que as empresas españolas deron un paso importante
na transformación dixital dos seus negocios en 2021, “incrementando
o uso de tecnoloxías emerxentes como a Intelixencia Artificial, a
análise de datos, a computación na nube (Cloud Computing) ou
a Internet das Cousas (IoT polas súas siglas en inglés).
Nun
plano máis concreto, as empresas con sistemas intelixentes
aumentaron 1,3 puntos porcentuais no último ano, pasando do 7% en
2020 ao 8,3% en 2021. O uso de análise da información a gran escala
(Big Data) tamén evoluciona respecto de 2020: máis do
11% utilizaron este tipo de tecnoloxía fronte ao 8% do ano anterior.
A meta para 2025 é que unha de cada catro organizacións españolas
incorporasen estas tecnoloxías na súa actividade.
Ademais,
o 32% das empresas españolas declararon utilizar servizos na nube en
2021, o que supón un crecemento de 4 puntos porcentuais respecto ao
ano anterior.
En
canto á IoT, a tecnoloxía que interconecta obxectos e dispositivos
a través dunha rede, o crecemento foi “moito máis importante”,
de 11 puntos porcentuais, o que supón pasar de case o 17% en 2020 a
preto do 28% en 2021.
A
investigación engade que outras tecnoloxías que experimentaron un
crecemento relevante son os sistemas para o intercambio electrónico
de datos. As empresas que utilizaban este tipo de intercambio dentro
da compañía (ERP) eran o 45% do total en 2019. En dous anos, o
proceso de medre foi de máis de 6 puntos porcentuais, até acadar en
2021 preto do 52%. Tamén avanzou o intercambio de datos con
provedores e clientes (CRM), pasando de algo máis do 35% en 2019 ao
42% en 2021.
O
emprego da sinatura electrónica, pola súa banda, está moi
estendido entre as empresas: algo máis de oito de cada dez (82%)
usárona en 2021. Tamén case sete de cada 10 empresas fixeron uso
das redes sociais (67%), máis de 3 puntos porcentuais por encima de
2020. No relativo ao comercio electrónico, o informe explica que
“unha de cada catro empresas realizou vendas mediante comercio
electrónico ese ano, o que supón 2 puntos porcentuais máis que en
2019”.