O 77% da poboación internauta emprega xa a identificación dixital

Red.es presentou este xoves 16 de decembro os resultados do estudo sobre dixitalización da Administración, elaborado polo Observatorio Nacional de Tecnoloxía e Sociedade (ONTSI). Nel faise saber un importante auxe da identificación dixital, que xa é empregada polo 77% da poboación internauta para realizar algún tipo de consulta, proceso ou xestión administrativa, porcentaxe que se incrementa até o case o 87% cando se trata de persoas con idades comprendidas entre os 24 e 35 anos.
Na investigación engádese que a implantación das diferentes opcións de identificación dixital son valoradas de forma bastante ou moi positiva polo 65% dos internautas enquisados, mentres que só o 11% móstrase crítico, posto que considera a súa implantación nada positiva. En xeral, a valoración media que recibe a súa dispoñibilidade é de “notábel”, aínda que quen a utilizaron nalgunha ocasión danlle unha nota superior (7,7). Esta cualificación é inferior entre aqueles que non as utilizaron nunca (6,1).
Algo semellante acontece co grao de confianza que xera o seu uso. En xeral, o 66% das persoas fíanse dos sistemas de identificación dixital mentres que só a 11% mostra certa desconfianza.
Pola súa banda, as canles dixitais de atención cidadá contan con menor popularidade, sinálase, engadindo que “só son usadas por unha terceira parte da poboación (o 34%)”.
Por outra banda, case a metade das persoas enquisadas móstranse moi ou bastante favorábeis coa adopción de asistentes virtuais ou chatbots como unha ferramenta máis de comunicación coa Administración, fronte ao 24% que se manifesta crítico con este tipo de atención.
O informe explica tamén que o 57% dos enquisados móstranse moi ou bastante interesados na unificación da caixa de correos de notificacións da Administración pública, a través da que se poidan consultar as comunicacións enviadas desde os distintos organismos públicos.
O estudo reflicte asemade que a maioría da cidadanía (68%) realizou xestións ou trámites da Administración pública de maneira telemática, sendo as persoas con idades comprendidas entre os 55 e 64 anos quen máis o fixeron (o 74%).
Doutra banda, máis do 64% dos enquisados considera moi ou bastante positivo o poder realizar trámites online. Ademais, as persoas que os levaron a cabo nalgunha ocasión móstranse bastante satisfeitas e, en xeral, outórganlles unha valoración media de case un 8.