2011 comeza con cambios na directiva de Microsoft

Microsoft Ibérica, a filial de Microsoft para España e Portugal, vén de comezar o ano facendo cambios na súa directiva ao incorporar a Elena Mendoza como directora de grandes contas e partners e a Carlos de Torres, como director de Negocio OEM, un posto de vital importancia para a compañía, dende o que dirixirá as actividades destinadas á venda de software preinstalado en ordenadores, agora que Microsoft se atopa en plena expansión do novo sistema operativo Windows 7 e da suite ofimática Office 2010.
A experiencia de Carlos de Torres en marketing e desenvolvemento de negocio (derivado do seu paso por Telefónica como xerente de marketing en Internet de TPI), así como o seu demostrado espírito emprendedor aportará, segundo informan dende a entidade, “un gran valor ao traballo da sección OEM e á compañía en xeral”.
Pola súa parte, Elena Mendoza, dirixirá, dende o seu novo posto, as accións da compañía relacionadas co reforzo do vínculo existente entre o fabricante de software e os grandes clientes da compañía en España, ademais do desenvolvemento de actividades que permitan o crecemento da satisfacción destas organizacións día a día.
Mendoza desenvolveu a maior parte da súa traxectoria profesional en IBM, onde ao longo de 15 anos desempeñou distintos labores, dende enxeñaría de sistemas, ata dirección de servizos de software e redes, pasando por product manager e co-dirección de servizos e vendas para Europa.