O 18% das grandes empresas españolas xa apostan pola IA, superando á media europea
venres, 23 de abril do 2021
España
está a día de hoxe por enriba da media europea na incorporación
das tecnoloxías de Intelixencia Artificial por parte das empresas.
Así o certificou o observatorio ONTSI (Observatorio Nacional de
Tecnoloxía e Sociedade), adscrito a Red.es, que
vén de presentar un dossier (que podemos ver en PDF) sobre a
adopción das ferramentas intelixentes no tecido produtivo durante o
ano 2020, poñendo o foco en España e tamén no ámbito da Unión
Europea.
Segundo
recolle o documento, a intelixencia artificial (IA) ten, en xeral, un
baixo nivel de adopción nas empresas europeas. España, cunha
incorporación de IA nas empresas do 7%, figura por encima da media
da Europa dos 27 que se sitúa no 6%. Os países líderes son os
angloparlantes Irlanda (20%) e Malta (15%), seguidos dos nórdicos
Finlandia (10%) e Dinamarca (9%).
No
informe faise saber saber que entre as visións máis positivas sobre
este tipo de tecnoloxías, atópanse as que esperan que a IA se
inclúa de forma intensiva nas empresas “incrementando a
produtividade, a riqueza e modificando a estrutura laboral da maior
parte dos sectores económicos, incentivando a creación de novos
perfís laborais, especializados e de alto nivel”.
Atendendo
ao tamaño das empresas, o 18% das grandes empresas españolas xa
apostan pola IA, fronte ao 17% da media da UE. Pola súa banda, nas
pemes os datos de adopción de IA son aínda moi modestos tanto para
o caso de España (7%) como para a media da UE (6%).
Se
se ten en conta o tipo de tecnoloxía IA, a máis empregada nas
empresas españolas (tanto grandes empresas como pemes), é a
aprendizaxe automática a través de Big Data
(4%), seguida dos robots de servizo (3%), os asistentes virtuais a
clientes ou chatbots (2%) e o procesamento de linguaxe natural
(1%).
Segundo
o grao de adopción da IA por sectores empresariais en España, a
rama de actividade das axencias de viaxes e de reservas de operadores
turísticos é a máis proclive ao seu uso, abranguendo o 14% do
sector. Séguenlle as empresas de información e comunicación e o
sector TIC, cun 13% de adopción de sistemas de Intelixencia
Artificial. Tamén é intensivo o seu emprego en compañías
eléctricas e nos sectores de transporte, comercio polo miúdo e
aloxamentos, con usos de ferramentas con IA por encima do 10%.