Novo proxecto para mellorar con TIC a calidade de vida das persoas con Parkinson: o proxecto Mememtum
martes, 16 de abril do 2013
A
semana pasada púxose de relevo a nivel internacional unha das
principais doenzas neurolóxicas do noso tempo no Día Mundial do
Parkinson e en
Código Cero non quixemos deixar pasar a oportunidade de falar do
que se está a facer dende o eido TIC a prol de mellorar a calidade
de vida das persoas que sofren este mal. Se daquela afondamos no
proxecto Help, agora chéganos á redacción outra
proposta
de gran potencial para optimizar os coidados e a independencia dos
ditos colectivos, trátase do
proxecto Mememtum, que vén da man da empresa Taniwa
e que consiste nunha aplicación móbil que permite avaliar o estado
dun doente con trastornos do movemento e problemas de coordinación
derivados de enfermidades como o Parkinson ou
a esclerosis múltiple.
A
aplicación vai carretada sobre un teléfono móbil con cámara, que
é
o instrumento fundamental para verificar como se atopa o paciente e
como evoluciona, achegándonos un diagnóstico logo de enfocar ao
doente. E con só uns segundos de marxe. O proxecto, que
conta cun vídeo descritivo de seu, diríxese
por unha banda a facilitar a atención ás persoas que sofren este
tipo de males e, por outra banda, a pórlles a tódolos implicados
(familiares, pacientes, coidadores, médicos) as cousas o máis
doadas posíbeis, incluído o labor de seguimento. En virtude desta
iniciativa, sinala a empresa, “aos
médicos entrégaselles unha ferramenta de valoración obxectiva coa
que poden revisar a gravación para corroborar o diagnóstico
automático; aos doentes e familiares permíteselles facer o
seguimento dende o fogar, aforrándose desprazamentos; e ao sistema
sanitario achégaselle a posibilidade de aforrar custes”.
Cómpre sinalar que o proxecto é precisamente iso: un proxecto. Polo
tanto, precisa recursos para converterse nunha realidade espallada e
de uso común. Para isto, necesítase tamén desenvolver un prototipo
que implicaría un investimento de 16.000 euros e de tres mes de
traballo (desenvolvemento, deseño, aplicación, etc). “Con
este prototipo”,
informa a empresa, “poderemos
probar a idea e a tecnoloxía cun grupo de pacientes e acadar o
financiamento que se require para investir no persoal”.
Deste xeito, a empresa está a apostar arestora polas metodoloxías
do crowdfounding
que, como saberemos, consiste en buscar na comunidade en liña o que
doutro xeito, establecendo comunicación con poucos investidores
potenciais, sería inviábel: falamos de acadar pequenas achegas de
moitas persoas, a través de ferramentas como Verkami, servizo
onde xa está Mememtum aberto á participación e ao
co-financiamento compartido.