Novas axudas para a modernización tecnolóxica do comercio de proximidade
luns, 29 de agosto do 2011
A Consellería
de Economía e Industria, ao abeiro do Plan Ágora, agora RE-comercia, ten
deseñado unha estratexia de apoio e impulso económico ao comercio de
proximidade. Neste sentido a Consellería de Economía e Industria, vén de
publicar no DOG a posta en marcha dunha nova orde pola que se regula o proceso
de selección de empresas informáticas colaboradoras na xestión de subvencións
para a potenciación e mellora do uso das novas tecnoloxías no comercio galego.
Deste xeito, a
Administración autonómica financiará
até o 70% do custe de adquisición por parte dos comerciantes de equipamento
tecnolóxico, como ordenadores portátiles e de sobremesa, software de
xestión, páxinas web comerciais, TPV e outros compoñentes informáticos.
Na orde
distínguense dúas fases de actuación: unha primeira, destinada as empresas
informáticas que desexen solicitar ser entidades colaboradoras para ofertar os
seus produtos e servizos aos comerciante, e unha segunda fase, na que se
publica unha lista definitiva de empresas colaboradoras ao sistema de axudas.
A partires
desta segunda fase, como gran novidade da convocatoria, os comerciantes poderán
adquirir por primeira vez o material informático de forma directa nas tendas
das entidades colaboradoras, sen ter que adiantar os cartos antes de percibir a
subvención.
En canto a
modalidade da orde é de concorrencia non competitiva, o que quere dicir, que as
solicitudes de subvención serán atendidas respectando a súa orde de entrada e
sen comparación con outras solicitudes.
Neste senso, un
dos obxectivos da Consellería de Economía e Industria é a dinamización e
revitalización dun sector comercial fortemente afectado pola crise actual e o
seu achegamento á realidade tecnolóxica a prol da modernización e mellora da
competitividade.